Membru ASL-L halo asaun solidariedade hodi fahe sasán nesesidade bázika ba estudante Luo-oan ne’ebé hela iha Dili. Imajen TATOLI/Arminda Fonseca.

DILI, 27 marsu 2021 (TATOLI)—Asaun Solidáriu Luro-Lautém (ASL-L) ne’ebé halibur Luro-oan sira-ne’ebé servisu iha Dili, ohin, hola inisiativa halo asaun solidariedade hodi fahe nesesidade bázika ba estudante sira hosi Postu Administrativu Luro, Munisípiu Lautém, ne’ebé oras ne’e hela no aluga uma (kost) iha Dili.

Prezidente Asaun Solidáriu Luro-Lautém, António de Jesus Lira, hateten objetivu hosi asaun solidariedade ida-ne’e nu’udar apoiu umanitária ba estudante sira hodi auguenta moris iha situasaun pandémia COVID-19 liuliu implementasaun serka sanitária no konfinamentu obrigatóriu domilisiária iha Kapitál.

“Asaun solidadridade ne’ebé ami halo liuhosi apoiu ai-han ba estudante sira, ne’e la’ós ami buka simpatia ruma maibé ho objetivu estudante sira bele aguenta moris iha situasaun defisil nia laran iha implementasaun serka sanitaria ne’e. Tanba, ita iha prinsípiu ne’ebé bei-ala sira hosik mai ami katak Luro-oan iha situasaun saida de’it tenke sai nafatin família, maun-alin, inan-aman, raan no rai ida ba Luro ida de’it,” António de Jesus Lira hateten ba jornalista sira iha Sede Suku Faról, Dili, sabadu ne’e.

Iha situasaun difisil hanesan ne’e, nia hatutan, Luro-oan sira-ne’ebé servisu iha Dili, organiza malu fó hatene mós ba Luro-ona sira-ne’ebé servisu iha rai-li’ur fó apoiu osan uitoan hodi sosa ai-han tau hamutuk, hodi kanaliza fali ba estudante Luro-oan sira-ne’ebé hela iha kost.

“Apoiu ne’ebé ami halo, tanba Luro-oan ne’ebé servisu iha Dili organiza malu no fó hatene mós ba maluk sira-ne’ebé srvisu iha rai-li’ur hanesan Inglatera, Koreia no seluk tan, fó apoiu osan mai ami sosa sasán nesesidade bázika hanesan foos, mina no Mie Sedaap hodi kanaliza fali ba estudante sira-ne’ebé hela iha kost,” nia dehan.

Sasán nesesidade bázika ne’ebé sira fahe, tuir nia, bazea ba dadus ne’ebé sira halibur. Iha faze dahuluk ne’e, sira fahe ba estudante hamutuk na’in-100 no faze daruak nian sei fahe mós ba estudante sira hamutuk ema na’in-100-resin.  

“Ami rekolla dadus daudaun ne’e hamutuk ema na’in-100. Entaun, ami fahe sasán sira ne’e, kada estudante ida hetan foos kilo lima, mina 25 mili litru ida, mie sedaap falun haat,” nia informa.

Ba estudante sira-ne’ebé ASL-L fó apoiu, nia dehan, la’ós haree ba universitáriu de’it maibé hahú hosi estudante sira hosi ensinu sekundária to’o ensinu superiór.

Iha fatin hanesan, estudante Luro-oan ne’ebé oras ne’e hela iha uma aluga Comoro no eskola iha UNTL, Adida Maria Gorrete dos Santos Fernandes, hateten sente kontente tebes ho apoiu ne’e hodi bele tulun sira auguenta moris, tanba durante serka sanitaria ne’e estudante barak ne’ebé hela iha kost ne’e hahan laiha.

“Ami agradese ba mana no maun sira-nia laran luak fó apoiu ba ami estudante sira-ne’ebé hela iha kost,” nia dehan.

Benefisiáriu José da Costa Soares hateten, orgullu tebes bainhira hetan apoiu umanitária hosi Luro-oan sira ne’ebé servisu iha Dili no rai-li’ur hodi hatutan sira-nia moris, tanba iha situasaun serka sanitária difikulta tebes ba sira atu hetan ai-han.

“Ha’u agradese ba maun no mana sira ne’ebé servisu iha rai-laran no rai-liur, hodi fó ai-han uitoan ona ba ami. Maske uitoan maibé ha’u sente sufisiente atu auguenta moris iha situasaun difisil ne’e,” nia hateten.

Iha biban hanesan, Eis Deputadu FRETELIN Osório Florindo haktuir, apoiu ne’ebé fó ba estudante sira la’ós tanba polítika ka buka votu hosi estudante sira, maibé tanba nu’udár Luro-oan ne’ebé iha situasaun difisil nia laran ne’e iha obrigasaun atu tulun malu.

“Dala ida tan, buat ne’ebé fó tanba la’ós polítiku ka buka votu iha imi. La’ós tanba ami mak riku liu maibé pelumenus saida mak ami iha tau hamutuk, fó uitoan ba imi atu tahan hamlaha loron ida ka rua nian,” Eis Deputadu ne’e dehan.

Entretantu, Deputadu Partidu Demoktrátiku (PD), Mariano Asanami Sabino dehan, apoiu ne’ebé sira halo la’ós tanba interese polítiku maibé tanba nu’udár maun-alin hanesan valór fraternidade no solidariedade.

“Ha’u husu nafatin ba Luro-oan sira, iha situasuan difisil saida de’it tenke kria solidáriu, fraterna no domin, tanba hadomi malu ne’e mak importante,” nia dehan.

Maske nune’e, nia apela ba esudante Luro-oan sira no mós ba hotu-hotu katak maske daudaun ne’e iha situasaun defisil nia laran maibé kontinua nafatin estuda no estuda.

“Ha’u husu ba estudante hotu-hotu iha iha situasaun agora labele hanoin tanba COVID-19 ne’ebé ha’u lakohi estuda. Maibé, nafatin hakaas-aan estuda tanba futuru nasaun nian, iha joven sira-nia liman,” nia apela.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here