Arguidu na'in-hitu ne'ebé tortura joven na'in-rua ba hatán iha TDD. Imajen Tatoli/Nelson de Sousa

DILI, 26 marsu 2021 (TATOLI)-Tribunál Distritál Dili (TDD) liuhosi desizaun primeiru interrogatóriu, sesta ne’e, aplika prizaun preventiva ba arguidu na’in-tolu ho inisiál JODC, ALBDC ho JG, hodi ba kumpre iha otél prodeo ka Prizaun Becora, Dili.

Juiza prosesu, Maria Solana, foti desizaun ne’e ho baze faktu hosi Ministériu Públiku, ne’ebé konfirma arguidu na’in-tolu ne’e iha indísiu natoon involve iha kazu tortura joven na’in-rua ne’ebé viral iha rede sosiál Facebook.

Notísia Relevante : Tortura joven na’in-rua, MP akuza arguidu sira ho krime lima

Juiza Maria Solana mós aplika medida koasaun aprezentasaun periódika (AP) ba arguidu na’in-haat seluk ho inisiál DDJ, AS, CM no MS.

Liuhosi audiénsia primeira interrogatóriu ne’e, Ministériu Públiku ne’ebé reprezenta hosi Prokuradór Matias Soares ho Prokuradór Rogério Viegas, imputa krime lima  ba arguidu sira hanesan sekuestru previstu iha artigu 160, Raptu previstu iha artigu 161,violasaun ba domisíliu previstu iha artigu 185, uzudukasaun funsaun, asosiasaun kriminoza previstu iha artigu 188 no hotu-hotu iha kódigu penál Timor-Leste.

Notísia Relevante : Tortura joven na’in-rua, Polísia lori arguidu sira ba hatán iha Tribunál

Advogadu privadu Octavio Cardoso ne’ebé fó asisténsia ba arguidu sira hateten, razaun Tribunál aplika prizaun preventiva ba arguidu na’in-tolu tanba iha indísiu forte krime lima ne’ebé promove hosi Ministériu Públiku.

Nia dehan, maibé foin iha faze investigasaun katak sei iha indísiu hodi fasilita investigasaun autoridade judisiál hodi hein julgamentu normal tuir mai mak bele kualifika arguidu sira komete duni krime ne’e ka la’e.

“Iha posibilidade medida koasaun ne’e parte defeza sei haree fila-fali atu halo rekursu ka lae,’’ Octavio Cardoso hateten ba jornalista iha TDD.

Kona-ba arguidu sira ne’ebé Tribunál aplika medida koasaun aprezentasaun periódika sei aprezenta aan iha semana ida dala-rua ba iha Tribunál.

Arguidu sira mós hetan asisténsia legal hosi advogadu privadu nain rua seluk tan maka hanesan Ismael Assunção Lopes ho Marito da Costa.

Jornalista   : Nelson de Sousa

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here