Prezidente Autoridade Munisípiu Dili, Gaspar Soares. Imajen/Tatoli

DILI, 26 marsu 2021 (TATOLI)—Prezidente Autoridade Munisípiu (PAM) Dili, Gaspar Soares, rekuñese durante hala’o nia mandatu ne’e iha servisu barak mak seidauk finaliza tanba servisu hirak ne’e hala’o tuir saida mak lei haruka.

“Ha’u hatene buat barak mak ha’u seidauk bele halo hotu iha hau-nia mandatu tomak. Maibé, iha servisu balun ne’ebé mak tenke la’o tuir lei autoriza, ita labele foti desizaun naran-naran de’it,” Gaspar Soares informa ba Agência TATOLI, liuhosi telefónika, sesta ne’e.

Gaspar Soares hateten, servisu hirak ne’ebé mak dala barak komunidade halerik no preokupa mak bee-moos, maibé ida-ne’e parte Servisu Água Saneamentu (SAS) nasionál mak kobre hotu tanba Munisípiu Dili mós tama ona ba nasionál.

Kapitál Dili. Imajen/Espesiál.

“Ita rekuñese, komunidade sei halerik no terús asesu ba bee-moos. Ami hosi Munisípiu Dili halo ona enkontru ho Diretór Jerál Servisu Água Saneamentu nian, maibé sira hateten ida-ne’e Munisípiu Dili la presiza halo programa oioin kona-ba bee-moos iha Dili. Maibé, sira iha ona planu nasionál kona-ba kestaun bee-moos iha Munisípiu Dili. Ho ida-ne’e, ha’u hein katak ida-ne’e bele akontese iha tempu badak nia-laran para depois bele rezolve komunidade nia halerik ba bee-moos ne’e,” nia informa.

Nia informa, iha Kapitál Dili sei iha fatin barak mak susar ba bee-moos hanesan Taibesi, Becora, Comoro, Manleuana no fatin seluk ne’ebé rai aas, halo abitante sira susar hetan bee-moos no halerik to’o ohin loron.

Problema seluk, nia informa, lixu ne’ebé ema soe arbiru sai hanesan kestaun ida maibé Autoridade Munisípiu Dili (AMD) labele foti desizaun tanba labele fó sansaun ka multa ba ema sira-ne’ebé soe lixu arbiru no halo infrasaun (kontra).

Nia dehan, maske iha Dekretu-lei númeru 33/2008, ko’alia kona-ba Ijiéne no Órden Públika atu fó sansaun maibé ekipa pesoál sira labele aplika tanba sei presiza lei seluk ida tán ne’ebé mak atu haforsa lei refere.

“Tanba iha Dekretu-lei 33/2008, 22 marsu, mós hateten bainhira ita fó multa ka sansaun ba ema ida, tenke haree ba nia rendimentu loron-loron nian. Nune’e, Governu presiza kria dekretu-lei ida hodi haforsa mak ita bele implementa. Hirak ne’e mós sai dezafiu boot ba ita durante iha ha’u-nia mandatu ne’e,” nia hateten.

Notísia Relevante: Dekretu-lei 33/2008 kona-ba Ijiene no Órden Públika seidauk aplika

Dezafiu seluk, nia dehan, ema maihosi munisípiu hotu-hotu ne’ebé konsentra iha Munisípiu Dili, balun eskola, balun halo negósiu no balun buka servisu tanba sira hanoin katak iha Dili ne’e hanesan fatin ida-ne’ebé garante sira-nia moris di’ak. Tanba, populasaun hirak ne’e barak mak la preparadu no la konsege kompete, entaun nia konsekuénsia mak halo uma iha mota ibun, esgotu leten, tasi ibun, halo krime ka halo buat oioin de’it.

“Maske lei ba ijiéne públiku iha maibé presiza haforsa tan dekretu lei balun. Tanba durante ne’e ami-nia ekipa kontinua ho esforsu oioin atu prevene, maibé komunidade mak falta konsiénsia. Ida-ne’e halo parte mós servisu ne’ebé mak Autoridade Munisípiu Dili (AMD) labele jere ho di’ak tanba lei la forte, maske AMD iha esforsu oioin atu rezolve,” nia dehan.

Tanba ne’e, nia hein katak, Prezidente Autoridade Munisípiu Dili foun ne’ebé atu mai bele bele serví di’ak liután povu iha Munisípiu Dili ne’e iha futuru. Importante, tuir nia, sé mak lidera fali mós tenke hala’o nia knaar ho di’ak oinsá halo atendimentu públiku ne’ebé di’ak no lori dezenvolvimentu Munisípiu Dili ne’e ba oin.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here