Aprezentasaun ezbosu dezeñu finál ponte foun lima hosi Konsultór Lelo Engineering, Unip. Lda ho parseiru. Imajen/DNEPCC

DILI, 26 marsu 2021 (TATOLI)-Ministériu Obra Públika (MOP) liuhosi Diresaun Nasionál Estrada, Ponte no Kontrolu Cheia (DNEPCC, sigla Portugés) hahú halo avaliasaun dokumentu estudu ezbosu dezeñu finál konstrusaun ponte foun hosi Konsultór Lelo Engineering, Unip. Lda ho parseria konsultór internasionál.

Ponte foun lima mak hanesan mota Suco Liurai, Maubara, Bera Railaco, Sanfuk, no Tutuluro-Same, ne’ebé sei implementa no loke konkursu públiku ba konstrusaun iha tinan ne’e.

“Ami haree ona aprezentasaun hosi konsultór no konkluzaun hosi ita-nia espertu ba área ponte katak konsultór presiza hadi’a buat balun, ne’ebé sira konkorda no tempu badak sei hatama filafali estudu dokumentu finál mai diresaun, nune’e iha fulan-abríl  bele haruka ona ba Ajénsia Dezenvolvimentu Nasionál (ADN),” Diretór Nasionál Estrada, Ponte no Kontrolu Cheia, João Mário Gama de Sousa, informa ba Agência TATOLI, iha ninia knaar fatin, Comoro, Dili, sesta ne’e.

DNEPCC iha ekipa téknika área profesionál ba ponte ne’ebé fó asisténsia no halo akompañamentu ba empreza nasionál hodi halo estudu detalladu tuir padraun internasionál.

“Ita-nia mota sira lahanesan mota iha nasaun balun, tamba mota sira lori sedimentasaun no bele muda-an tuir tempu, liuliu bainhira tempu udan,” nia akresenta.

Diretór Nasionál ne’e dehan, konkursu públiku sei hahú hafoin hetan verifikasaun hosi ADN ba ponte lima, kompostu rua mak substitui ponte tuan no  ponte ida mak iha Suai (ponte Sanfuk no trosu estrada nasionál) no ponte Maubara, ne’ebé presiza troka ba foun tuir estudu ne’ebé konsultór halo, tanba ponte antigu ne’e iha ona problema no mós laiha ona kapasidade atu netraliza bee-mota bainhira akontese inundasaun.

Kustu totál obra ne’e seidauk bele fó sai tanba ADN seidauk verifika no seidauk realiza konkursu publiku.

Jornalista: Florêncio Miranda Ximenes

Editora: Julia Chatarina