Ilustrasaun vasina COVID-19. Imajen/Espesiál

DILI, 26 marsu 2021 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, husu ba komunidade atu fiar de’it ba informasaun kredível no labele dúvida ho planu vasinasaun nasionál prevene COVID-19, ne’ebé Governu sei realiza iha tempu badak.

“Komunidade fiar de’it ba informasaun kredível hosi Sala Situasaun Sentru Integradu Jestaun Krize (CIGC, sigla portugés) no Ministériu Saúde (MS) kona-ba vasinasaun, tanba sira maka sei esplika parte tékniku vasinasaun AstraZeneca no labele fiar fonte seluk ne’ebé laiha responsablidade,” Seretáriu Estadu Akara, informa ba Agência TATOLI, iha areadór Arkivu no Muzeu Rezisténsia, sesta ne’e.

Notísia relevante: Reuniaun KM: aprova roteiru vasinasaun kontra COVID-19

Nia dehan, prevensaun COVID-19 maka durante ne’e Governu aplika Estadu Emerjénsia no Serka Sanitária inklui vasinasaun, ne’ebé hanesan polítika Estadu no Governu atu proteje sidadaun.

“Ezemplu, ema balun lansa informasaun kona-ba impaktu negativu vasina AstraZeneca ne’ebé bele halo mate, maibé Doutór hosi Ministériu Saúde (MS) esplika katak seidauk iha prova ema mate tanba vasina,” nia akresenta.

Tanba ne’e, nasaun boot sira hanesan Inglaterra, Canadá, no nasaun seluk kontinua uza AstraZeneca no parte Organizaun Mundiál Saúde (OMS) fó garantia seguransa.

“Entaun ita kontinua vasina, Governu kumpre no rona konsellu OMS maka sai baze Governu foti desizaun hodi uza aimoruk ne’e ba vasina,” nia hatutan.

Aleinde ne’e, Sala Situasaun CIGC no MS sei kolabora ho mídia hotu atu kontinua halo sosialisaun no halo preparasaun ba vasinasaun nasionál.

“Sosialisaun kontinua la’o, Governu tenke esplika téknika. Ha’u fiar populasaun tenke simu vasinasaun ne’e atu aumenta imunidade ba isin,” nia tenik.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here