SEJD, Abrão Saldanha ko’alia ba média, hafoin enkontru ho líder IKSPTL no 77 iha edifísiu SEJD Lecidere, sesta (26/03/21). Imajen Tatoli/Tomé Amado.

DILI, 26 marsu 2021 (TATOLI)—VIII Governu konstitusionál liu hosi Sekretáriu Estadu Joventude no Desportu (SEJD), Abrão Saldanha, husu líder arte marsiál Ikatan Keluarga Silat Putra Timor Leste (IKS-PTL) no arte rituál bua malus 77, atu fó atensaun no kontrola membru-sira, labele halo krimi liuliu asalta-malu iha sidade Dili.

“Ha’u apela ba responsável másima hosi organizasaun rua ne’e, atu responsabiliza aktu-sira ne’ebé komete hosi membru-sira. Husu mós ba membru-sira atu labele halo tan krimi hanesan iha loron hirak liu-bá,” Abrão Saldanha fó atensaun ne’e liuhosi konferénsia imprensa iha edifísiu SEJD Lecidere, sesta ne’e.

Notísia relevante:Tortura joven na’in-rua, MP akuza arguidu sira ho krime lima

Abrão Saldanha relata, tuir dadus ne’ebé SEJD rekolla katak, membru-sira ne’ebé mak salta malu no hana malu  to’o balun hetan kanek, ikus mai deklara katak, sira lori naran organizasaun rua nian.

Nune’e, Sekretáriu Estadu ne’e konsidera Lei númeru 5/2007, ne’ebé regula atividade organizasaun arte marsiál iha Timor-Leste, la forte tanba Governu labele foti sansaun rigrozu hasoru organizasaun rua ne’e.

“Ba oin mak membru hosi organizasaun rua kontinua asalta-malu ne’e responsabilidade organizasaun-nian no prosesu ba membru-sira kontinua la’o tuir nafatin Lei ne’ebé vigora iha nasaun ne’e,” nia subliña.

Iha fatin hanesan Prezidente IKSPTL, Silvester Xavier Sufa, hateten regra organizasaun nian la fó dalan ba membru ida atu halo torturasaun ka halo violénsia hasoru ema seluk.

IKSPTL iha estatutu, organograma no regra atu regula membru-sira no to’o oras ne’e seidauk iha orientasaun ida hosi organizasaun atu halo asaun torturasaun no violénsia hasoru maluk-sira seluk.

Tanba ne’e maka IKSPTL hakarak deklara katak, membru ne’ebé komete ona iha asaun violénsia no torturasaun hasoru maluk-sira seluk,  ne’e krimi.

“Husu ba membru tomak iha territóriu tomak atu tuur hakmatek hodi hanoin situasaun rai laran ne’ebé enfrenta hela surtu COVID-19,” nia apela.

Nia mós husu atu hakmatek hodi fó espasu ba autoridade Estadu-nian bele hala’o sira-nia serbisu ho livre, nune’e virus ne’e bele lakon hosi Timor-Leste.

Prezidente IKSPTL ne’e subliña katak, organizasaun nia misaun loloos maka kontribui ba dezenvolvimentu nasaun-nian.

Nia mós deklara, bainhira mosu konfrontasaun iha futuru no envolve membru IKSPTL, organizasaun sei la toma responsabilidade no sei konsidera katak ne’e problema individu no tenke hasoru justisa.

Alende ne’e, porta vóz arte rituál bua malus 77, Abílio Soares konsidera asalta-malu ne’ebé envolve membru 77, konsidera individu tanba seidauk iha orientasaun hosi superiór organizasaun-nian atu halo krime.

“Kazu asalta-malu ne’e bainhira akontese tiha mak ami foin hatene. Tanba ne’e, ami hakarak husu ba membru sira iha Timor laran, atu labele komete krime. Bainhira iha membru ruma mak komete krime, husu PNTL kaer no lori ba justisa,” nia apela.

Nia mós deklara prontu hatan justisa, bainhira iha investigasaun deteta katak, superiór 77 mak fó orientasaun ba membru atu halo krime.

“77 hanorin atu respeita sofrimentu povu ba rai ida ne’e, hanorin atu kria paz, dame no haburas domin iha komunidade,” nia subliña.

Entretantu iha loron 21 marsu 2021, tuku 14:20 Otl, mosu asidente Sekuestru no Raptu” ne’ebé komete hosi joven na’in-hitu halo detensaun ilegál hodi transfere no kaptura joven na’in-rua ho inisiál AC no AB iha área Fomentu, Suku Comoro no Beto Tasi (Kampung Marinir), Suku Madohi, Postu Administrativu Dom Aleixo, Dili.

Hafoin kaptura joven rua ne’e, arguidu sira halo gravasaun vídeo hodi hatudu sira-nia asaun torturasaun hodi fó-sai iha rede sosiál Facebook.

Iha segunda (22/03/21), Komandu PNTL Dili liuhosi Seksaun Investigasaun Kriminál no Serbisu Informasaun Polísia (SIP) buka tuir arguidu sira halo investigasaun no rekolla mós informasaun hosi sasin balun no koordena ho Ministériu Públiku hodi husu mandadu detensaun buska no apreensaun.

PNTL halo mós apreensaun ba sasán evidénsia sira ne’ebé arguidu sira uza hodi tortura joven na’in-rua maka hanesan, karreta pick-up ida, telemovel rua, katana ida, atributu organizasaun Ikatan Keluarga Silat Pemuda Timor-Leste (IKS-PTL), hanesan kalsa, kamiza, sintu no broxura IKS-PTL nian, inklui gás lakrimojéniu ida.

Notísia relevante:Tortura joven na’in-rua, Polísia lori arguidu sira ba hatán iha Tribunál

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here