Ministru Prezidénsia Konsellu Ministru, Fidelis Manuel Leite Magalhães sai moderadór iha APFSD 2021 via online, sesta (26/03). Imajen/PCM

DILI, 26 marsu 2021 (TATOLI)—Ministru Prezidénsia Konsellu Ministru, Fidelis Manuel Leite Magalhães, partisipa nu’udar moderadór iha Fórum Ázia-Pasífiku ba Dezenvolvimentu Sustentável (APFSD, sigla inglés) 2021 ba dala-8, iha sesta (26/03), ne’ebé realiza iha Bangkok, Tailándia, via online.

Fórum globál ne’e realiza hosi Nasaun Unida-Komisaun Ekonómika no Sosiál ba Ázia no Pasífiku (UNESCAP, sigla inglés), hahú loron 23 to’o 26 marsu, hodi atualiza progresu Objetivu Dezenvolvimentu Sustentável (ODS) país membru, ne’ebé permite revizaun no avaliasaun kredível ba progresu inklui fahe ideia no prátika di’ak sira entre ajente Estadu no parte interesada sira.

Diálogu nível a’as ne’e, ho tema ‘halibur esforsu hodi rekupera hosi COVID-19 iha rejiaun Ázia-Pasífiku – dalan ba rekonstrusaun hamutuk’, ne’ebé atu buka fornese no análiza perspetiva país membru sira bele rekupera-an hosi pandemia.

“Nu’udar formuladór polítika sira, ita tenke hatene opsaun hirak ne’ebé iha atu impulsiona rekuperasaun ekonómika hosi pandemia no labele haluha sustentabilidade. Opsaun hirak ne’e sei ajuda hadi’a igualdade ekonómika, hadi’a seguransa no aumenta reziliénsia hasoru krize sira ne’ebé bele maihosi pandemia ruma iha futuru ka hosi orijen saida de’it,” governante ne’e relata, hanesan haktuir iha nota imprensa ne’ebé Agência TATOLI asesu iha sesta ne’e.

Portavós Governu otimista katak perspetiva ne’ebé Timor-Leste atu la’o tuir no hein, bele rekonstrui no hadi’a liután ekonomia rai-laran iha ámbitu pandemia.

Ministru Prezidénsia Konsellu Ministru, Fidelis Manuel Leite Magalhães sai moderadór iha APFSD 2021 via online, sesta (26/03). Imajen/PCM

Entre tinan 2019 no 2020, Ministru Fidelis asume pasta hanesan Prezidente Komisaun UNESCAP.

Fórum ne’e funsiona mós hanesan sorumutuk preparatóriu ida ba fórum polítiku nível a’as nian (HLPF, sigla inglés).

Iha parte dahuluk diálogu nível a’as ne’e, partisipante sira halo avaliasaun kona-ba pontu situasaun iha rejiaun rua, hafoin tinan ida liu moris ho COVID-19 hodi destaka lisaun sira ne’ebé aprende ona.

Iha parte daruak, reprezentante nível a’as sira halo reflesaun kona-ba faze rekuperasaun no aprezenta ideia ba esforsu hamutuk ne’ebé kondús ba rekuperasaun sustentável ida ho prazu naruk ba sosiedade no ekonomia sira.

Fórum Ázia-Pasífiku ne’e hanesan intergovernamentál ne’ebé hala’o kada tinan ho objetivu atu halo akompañamentu no revizaun ba progresu ajenda tinan 2030 no ODS iha nível rejionál.

Partisipante iha eventu ne’e maka ministru no funsionáriu nível a’as Governu, akadémiku no grupu reflesaun sira, reprezentante hosi organizasaun internasionál sira, setór privadu, sosiedade sivíl no parte interesada seluk hosi rejiaun rua.

Antes ne’e, iha jullu 2019, Grupu Traballu hosi Timor-Leste aprezenta ona rezultadu implementasaun ODS, iha Nova Iorke.

Timor-Leste foku ba ODS númeru 2 eradika hamlaha, 3 saúde no bem estár, 4 eduksaun ho kualidade, 5 igualdade jéneru, 6 bee-moos no saneamentu inklui 9 indústria, inovasaun no infraestrutura.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here