Diretora Ezekutiva Forum Komunikasaun Feto Timor Lorosa'e (FOKUPERS), Maria Fátima Perreira Guterres. Imajen/Espesiál

DILI, 26 marsu 2021 (TATOLI)—Diretora Ezekutiva Forum Komunikasaun Feto Timor Lorosa’e (FOKUPERS), Maria Fátima Perreira Guterres, husu asisténsia pesoál saúde ba Governu liuliu Ministériu Saúde (MS) atu fó asisténsia ba vítima sira-ne’ebé hetan moras iha uma mahon, liuliu iha situasaun serka sanitaria ne’e nia laran.

Notísia Relevante: Serka Sanitária, FOKUPERS rejistu kazu violénsia hasoru feto hamutuk 47

“Ami husu asisténsia pesoál saúde ema na’in-ida ka rua ba Ministériu Saúde atu apoiu uma mahon durante serka sanitaria ne’e. Atu nune’e, vítima violasaun sira iha uma mahon moras karik, pesoál saúde ne’ebé sai pontu vokál Uma Mahon nian mak halo atendimentu de’it. Nune’e, ita labele lori sai vítima sira ba halo tratamentu iha liur, no labele hamosu transmisaun lokál COVID-19 ba vítima sira. Tanba bainhira vítima sira moras mak lori ba ospitál ka sentru saúde ruma ne’e, bele fó risku boot ba vítima sira,” Maria Fátima Perreira Guterres hateten ba Agência TATOLI, liuhosi telefónika, sesta ne’e.

Nia informa, antes ne’e FOKUPERS haruka ona karta ba Minstériu Saúde kona-ba husu asisténsia pesoál saúde ba uma mahon sira, tanba Ministériu Saúde mós iha matadalan ba atendimentu vítima violénsia bazea ba jéneru maibé to’o agora laiha resposta.  

“Ami fiar katak Ministériu Saúde iha kompromísiu apoiu FOKUPERS iha situasaun defisil hanesan ne’e. Tanba, to’o momentu ida-ne’e, buat ne’ebé difikulta tebes ami mak asesu ba fasilidade saúde,” nia dehan.

Bainhira aplika serka sanitária ne’e, nia dehan, vítima sira asesu ba fasilidade saúde sira maske liga ba asuntu seguransa saúde ladun di’ak, tanba membru FOKUPERS sira ne’ebé akompañia vítima sira iha ospitál, dala barak hadeer de’it ka dala ruma toba de’it iha rai.

“Membru FOKUPERS sira-ne’ebé hein vítima sira iha ospitál ka sentru saúde ne’e tenke estrakuidadu, tanba karik bele hetan suspeitu nia família ruma no bele hamosu tan problema iha ospitál. Tanba ne’e mak FOKUPERS deseza, hetan suporta hosi Ministériu Saúde iha situasan defisil ida-ne’e, nune’e vítima sira moras karik labele lori ba ospitál ka sentru saúde ruma,” nia hateten.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here