Ilustrasaun COVID-19/Espesial.

DILI, 26 marsu 2021 (TATOLI)—Sala Situação Centro Integrado Gestão de Crise (SS-CIGC), liu hosi Koordenadór Forsa-Tarefa ba Prevensaun no Mitigasaun, Rui Maria de Araújo fó-sai faktu loloos kona-bá pasiente hosi BTN II, Aldeia Terra Santa, Suku Madohi, Postu Administrativu Dom Aleixo, Munisípiu Dili.

Razaun SS-CIGC fó-sai faktu ne’e tanba primeiru, hakarak atu públiku hatene loloos kona-bá pasiente ne’e ninia istória moras hahú detetadu to’o rekoperadu.

Notísia relavente:COVID-19: pozitivu 58, rekoperadu 17 no ativu 298

Segundu, atu responde mós preokupasaun públiku kona-bá vídeo ne’ebé publika iha Youtube no espalla ona iha média sosiál, ne’ebé pasiente ho ninia perseiru no mós viziñu relata idaidak ninia esperiénsia tuir ida-idak ninia persesaun no interpretasaun.

Rui Maria de Araújo, hateten vídeo ida ne’ebé sirkula iha youtube horikalan no ohin, aprezenta Daniela Anin ninia deklarasaun, deklarasaun hosi ninia parseiru, no mós deklarasaun hosi viziñu balun. Sira hotu ninia deklarasaun ko’alia kona-bá buat ne’ebé akontese duni hosi 2 to’o 19 marsu 2021.

Nia hatutan, sira ida-idak relata esperiénsia rasik, iha Baucau, iha fatin kuarentena Novo Horizonte, Metiaut, Dili, BTN II Aldeia Terra Santa, Suku Madohi, no mós iha kuarentena Tibar, tuir sira ida-idak ninia persesaun no interpretasaun.

“Iha ámbitu liberdade espresaun ema ida-idak-nian, ita respeita,” Doutór Rui Araújo ko’alia liu hosi konferénsia imprensa iha Centro Convenções Dili (CCD), sesta ne’e. 

Tanba ne’e, Rui Maria de Araújo  hakarak hato’o ba públiku faktu hirak hanesan tuir mai katak, Daniela Anin, hela iha BTN I, aldeia Terra Santa, halo viajen ba Baucau iha 1 marsu.

2 marsu, viziñu-sira informa ba autoridade katak, sira deskonfia Daniela halo viajen hosi Indonézia. Loron ne’e kedas, ekipa saúde foti Daniela ninia amostra, haruka mai halo teste iha Dili.

Iha 3 marsu, hetan rezultadu hosi teste PCR, maibé Laboratóriu Nasionál Saúde (LNS) hakarak halo konfirmasaun, no husu ekipa saúde Baucau atu repete fali ninia teste.

4 marsu konfirmadu katak, ninia rezultadu pozitivu, maibé iha faze rekoperasaun. Ida ne’e signifika, nia hetan infesaun pelu-menus semana rua ka semana tolu ba kotuk, maizoumenus entre 4 to’o 11 fevereiru.

Ida ne’e signifika mós katak, hosi maizoumenus 18 fevereiru mai oin, nia bele hada’et-tutan hela moras ne’e ba ema seluk, sem nia rasik hatene, tanba nia la hatudu síntomas, ka asintomátiku. Hosi 7 marsu hahú deteta kazu lubuk ida iha duni viziñu-sira, ne’ebé hela besik Daniela.

Rui Maria de Araújo esplika tana, tuir medida prevensaun no mitigasaun ba COVID-19 ne’ebé adota mundialmente, primeiru, Daniela tenki ba kuarentena. Segundu, ema hotu ne’ebé iha kontaktu-besik ho nia tenki halo teste, no tenki ba kuarentena.

Tamba ne’e, sira na’in 11 hosi Baucau, no sira na’in ualu hosi BTN II, aldeia Terra Santa, iha kedan 4 marsu, foti hotu kedas sira-nia amostra, no lori sira ba kuarentena iha Novo Horizonte, no iha Tibar.

Objetivu hatama sira iha kuarentena atu observa, no halo teste, hodi nune’e prevene bainhira sira lori hela duni karik virus ne’e, sira sei la hada’et-tutan ba ema barak-liu. Felizmente, durante loron 14 iha kuarentena, sira nafatin negativu to’o sira fila ba uma.

“Faktu seluk, no importante, ne’ebé Daniela ho ninia parseiru Adolfo, la temi iha sira-nia deklarasaun iha védeo ne’ebé sirkula maka, primeiru ha’u rasik mak telefone ba Daniela, iha 4 marsu, maizoumenus tuku 5 lorokarik, halo pergunta balun kona-bá ninia istória viajen, no esplika rezultadu laboratóriu, esplika mós medida saida mak sei foti, hanesan temi ona iha leten,” nia subliña.

Nia hatutan, Daniela rasik, fó Adolfo nia númeru telefone, no Doutór Rui ko’alia duni ho Adolfo.

“Adolfo rasik hateten, nia mak lori Daniela ba sa’e bis iha Becora. Ha’u husu kona-bá ninia serbisu, serbisu ho sé, ema na’in hira, hafoin Adolfo fó númeru telefone motorista karreta saneamento ho naran Augusto Almeida da Costa,” Doutór Rui konta tuir.

Hafoin ko’alia tiha ho Adolfo, médiku ne’e ko’alia kedan ho Augusto Almeida no esplika ba Adolfo, nune’e mós ba Augusto Almeida katak, tanba deteta virus COVID-19 iha Daniela, nune’e tuir medida prevensaun no mitigasaun, husu sira-nia kolaborasaun, atu halo mós teste, no lori lai sira ba kuarentena.

Iha 5 marsu, Doutór Rui rasik telefone tan ba Daniela iha Novo Horizonte, no Adolfo iha Tibar, husu-tuir sira-nia kondisaun, no esplika ba sira nesesidade atu hela lai iha kuarentena to’o iha ona serteza katak, sira la reprezenta risku atu hada’et-tutan virus ba ema seluk.

Durante kuarentena, sira na’in 19 la hetan tratamentu ai-moruk espesífiku tanba, primeiru durante iha kuarentena, la deteta virus iha sira-nia isin, segundu tanba sira la hatudu síntoma.

Dala ida tan, iha kazu sira na’in 18 ne’ebé temi iha vídeo, Doutór Rui dehan, autoridade saúde deside atu lori sira ba kuarentena, tanba sira-ne’e kontaktu-besik ho kazu pozitivu Daniela.

“Lori sira ba kuarentena nu’udár medida prevensaun, atu karik sira pozitivu duni, sira labele hada’et-tutan ba ema seluk,” nia subliña.

Parte SS-CIGC rekomenda ba autór hosi vídeo ne’ebé fó-sai iha youtube, bainhira hakarak hetan rekoñesimentu nu’udár jornalista profisonál, di’ak liu halo cross-check ba faktu sira, molok halo publikasaun tendensiozu hodi hamosu konfuzaun iha públiku.

“Imi bele, tuda profisionãl saúde sira, imi bele dezakredita profisionál saúde-sira liu hosi publikasaun tendensiozu-sira hanesan ne’e, maibé ami sei la hakiduk, tanba ami-nia misaun maka buka-tuir ema hotu ne’ebé pozitivu, izola sira, buka-tuir sira nia kontaktu besik, tau sira iha kuarentena, halo teste ba sira, hodi nune’e moras ne’e labele da’et-tutan ba ema barak-liu tan,” Doutór Rui hato’o mensajen ho korajen.

To’o ohin, Sala Situação Centro Integrado Gestão de Crise (SS-CIGC), rejista tan kazu pozitivu foun COVID-19 na’in 58, ne’ebé detetadu hosi munisípiu Dili 54 ho Baucau haat, no númeru pasiente baixa aumenta ba 298.

Notísia relavente:Izolamentu Tasi-tolu iha fatin ezersísiu ba pasiente

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here