Ilustrasaun COVID-19. Imajen/Espesiál

DILI, 26 marsu 2021 (TATOLI)—Diretór Sala Situasaun Sentru Integradu Jestaun Krize (CIGC, sigla portugés), Brigadeiru Jenerál, João Miranda ‘Aluk Descartes’, informa Forsa Tarefa ne’ebé iha responsabilidade área infraestrutura, daudaun ne’e prepara medida adekuada hanesan infraestrutura hodi responde evolusaun no senáriu piór COVID-19.

Inisiativa ne’e tanba nota katak iha loron ikus, pasiente pozitivu COVID-19 aumenta ba bebeik, ne’ebé to’o ohin loron kazu ativu baixa hela iha sala izolamentu Vera-Crúz no Tasi-tolu hamutuk 298.

“Númeru kazu pozitivu loron ba loron kontinua aumenta, la’ós iha Dili de’it maibé espande ba munisípiu balun, ne’e duni Sala Situasaun liuhosi Forsa Tarefa ne’ebé iha responsabilidade ba área infraestrutura tenke iha medida adekuada, kuandu laiha maka númeru ne’e ultrapasa ita-nia kapasidade atendimentu no kria problema ida mai ita hotu,” Diretór Sala Situasaun CIGC, Brigadeiru Jenerál, João Miranda ‘Aluk Descartes’, hafoin ramata reuniaun ho Primeiru-Ministru, Taur Matan Ruak, iha Palásiu Governu, sesta ne’e.

Maski nune’e, Ministériu Saúde (MS) ne’ebé kolabora serbisu ho CIGC, hasoru difikuldade tanba menus rekursu umanu.

“Ho rekursu umanu ne’ebé natón, sira nafatin esforsu-an hodi presta serbisu di’ak liu hodi serví nasaun no povu liuhosi liberta povu hosi moras COVID-19 ne’e,” nia akresenta.

Sorin seluk, durante enkontru ho ekipa Sala Situasaun CIGC, Xefe Governu hatama relatóriu molok Parlamentu Nasionál aprova renovasaun Estadu Emerjénsia.

“Ami ko’alia kona-ba relatóriu atividade hotu ne’ebé hala’o dezde estensaun Estadu Emerjénsia ba da-XI. Aleinde relatóriu, ko’alia mós posível iha estensaun Estadu Emerjénsia ba da-XII ne’ebé mak Konsellu Ministru aprova ona maibé tenke hein aprovasaun iha Parlamentu Nasionál, maibé Primeiru-Ministru husu ami tenke aprezenta relatóriu molok submisaun proposta foun kona-ba estensaun Estadu Emerjénsia,” nia akresenta.

Enkuantu, tuir Diretór Sala Situasaun CIGC, atu estende serka sanitária iha munisípiu Dili, Baucau no Viqueque, depende ba evolusaun situasaun ne’ebé mak iha munisípiu sira.

“Maibé ho evolusaun kazu ne’e loron-loron, klaru katak sei kontinua hikas serka sanitária ba munisípiu ne’ebé daudaun sei iha kazu ativu,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here