Diretor CIGC, Brigadeiru-Jenerál, João Miranda 'Aluk Descartes' . Imajen TATOLI/Egas Cristovão

DILI, 26 marsu 2021 (TATOLI)-Diretór Sala Situasaun, Sentru Integradu Jestaun Krize (CIGC, sigla portugés), Brigadeiru Jenerál João Miranda ‘Aluk Descartes’, rekoñese daudaun ekipa konjunta hala’o ona formasaun no simulasaun ba profisionál sira bainhira hala’o seremónia fúnebre ema mate tanba COVID-19 inklui prepara kaixaun.

Ho ida ne’e, nia husu ba populasaun hotu atu labele pániku ho medida ne’ebé ekipa Forsa Tarefa sira halo, tanba ne’e hanesan preparasaun hodi responde ba situasaun piór.

“Aproveita biban ne’e apela ba públiku, labele pániku ho medida sira hosi Sentru Integradu prepara hanesan kaixaun ba kazu mortál no treina ekipa sira atu hakoi pasiente ruma karik mate,” Brigadeiru Jenerál Aluk relata hafoin hamutuk ho ekipa hasoru malu ho Primeiru-Ministru, Taur Matan Ruak, iha Palásiu Governu, sesta ne’e.

Diretór CIGC dehan, maski seidauk iha kazu COVID-19 ne’ebé mate iha Timor-Leste, maibé Governu presiza prepara ba senáriu a’at.

“Ita hotu hatene, iha ita-nia felizmente seidauk iha kazu óbitu maibé haree hosi nasaun barak, medida ne’ebé sira foti relasiona ho óbitu bele dehan liu ona kapasidade atendimentu. Hein katak ita labele tama ba situasaun ne’e, tanba ne’e maka Forsa Tarefa Reasaun Rápida atu responde ba situasaun ho medida sira, nune’e karik iha óbitu, iha ona mínimu preparasaun atu hakoi ema ho dignu,” nia akresenta.

Tuir Brigadeiru Jenerál, preparasaun ne’e la signifika pasiente sira ne’ebé daudaun baixa iha sala izolamentu ne’e grave ou todan.

“La’ós katak ita prevee medida ida-ne’e tanba iha ona pasiente balun iha izolamentu grave, maibé to’o agora pasiente pozitivu iha faze lijeiru ka kama’an,” nia hatutan.

Relasiona ho evolusaun kazu ativu COVID-19 iha munisípiu Dili, maka iha kinta (25/03), ekipa konjunta kompostu husi Ministériu Solidariedade Sosiál no Inkluzaun (MSSI), Ministériu Saúde (MS) no Ministériu Administrasaun Estatál (MAE) hala’o ona formasaun no simulasaun kona-ba prevensaun no kontrolu infesaun inklui jestaun óbitu ne’ebé seguru, nune’e bele iha preparasaun no koñesimentu bainhira ekipa hala’o serimónia fúnebre ba ema mate tanba COVID-19.

To’o 25 marsu ne’e, kazu ativu COVID-19 hamutuk 257 mak baixa hela iha sala izolamentu, ne’ebé maioria hosi munisípiu Dili.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here