Deputada Bankada PLP, Maria Angelina Sarmento Lopes. Imajen/Egas Cristovão

DILI, 26 marsu 2021 (TATOLI)—Bankada Partidu Libertasaun Populár (PLP) husu Governu aselera apoia umanitária no sosiál ho urjénsia tanba konsekuénsia hosi serka sanitária no konfinamentu domisiliária halo atividade ekonómika paradu.

Deputada Bankada PLP, Maria Angelina Lopes Sarmento, hateten Governu halo kompromisu hodi apoia komunidade ho lalais liu ba efeitu sosiu-ekonómiku iha rai-laran maibé presiza aselera planu ne’e.

“Husu Governu aselera apoia umanitária no sosiál ho urjénsia tanba konsekuénsia hosi serka sanitária no konfinamentu domisiliária ne’e halo komunidade barak hetan susar no halerik ba hahan,” Deputada Maria Angelina Lopes Sarmento, informa ba jornalista sira, iha Parlamentu Nasionál, sesta ne’e.

Nia haktuir, iha ona grupu estudante voluntária sira mós organiza malu fó apoia ba estudante sira maibé semana kotuk mós Ministériu Solidariedade Solidariedade no Inkluzaun Sosiál (MSSI) distribui ona foos ba estudante sira.

“Ida-ne’e seidauk to’o tanba ita haree sosiedade ida-ne’e la’ós estudante de’it mak hasoru problema, ema sira-ne’ebé fila-liman, ema sira-ne’ebé lori mikrolete, taxi no ema sira-ne’ebé fa’an pulsa mós hasoru ptoblema. Sira-ne’e afetadu hotu hosi serka sanitária, tanba dalabarak sira-ne’ebé lori taxi no mikrolete liuhosi transporte públiku sira-ne’e mak bele hetan osan rahun hodi hola hahan,” nia dehan. 

Nune’e mós, nia dehan, ema sira-ne’ebé fa’an pulsa, servisu kompañia ne’ebé presiza movimentasaun transporte públiku, laiha motorizada iha uma, entaun kompañia deside ko’a sira-nia osan ne’e agora moris susar.

“Ema sira-ne’e presiza intervensaun lalais hosi Governu. Tanba konsekuénsia hosi serka sanitária kontinua estende ne’e mak ema hakilar ba hamlaha,” nia dehan.

Nia fó hanoin ba Governu aserta medida sósiu-ekonómika ne’e no bele aprezenta ba Parlamentu Nasionál. Maske programa cesta bázika ne’e di’ak maibé iha ninia implementasaun ne’e hamosu problema hanesan la kumpre distansiamentu sosiál, entaun Governu tenke mekanizmu seluk atu fahe sasán ka distribui osan.

“Ha’u hanoin cesta bázika ne’e di’ak maibé problema barak tanba iha implementasaun populasaun la kumpre distansiamentu sosiál, ne’ebé Governu tenke buka mekanizmu ida di’akliu atu bele distribui sasán ka distribui osan, Naibé sasán ne’e ha’u haree lori perigu boot liu ba ema-nia aglomerasaun pesoa, ne’ebé halibur ema barak no bele kontamina ne’e lalais liuhosi fahe sasán modelu hanesan cesta bázika ne’e,” dehan.

Deputadu Bankada PLP ne’e halo observasaun katak, durante ne’e kompañia sira barakliu dependénsia makaas liu ba Orsamentu Jerál Estadu no setór privadu uitoan de’it mak investe iha setór produtivu.

“Uitoan de’it, maioria ne’e ita bele dehan 75% ne’e hosi empreza Timorense (setór privadu) ne’e depedénsia ba orsamentu jerál estadu hodi realiza projetu infraestrutura sira, entaun sira labele sobrevive hanesan tempu agora. Tanba ne’e mak presiza governu halo intervensaun ho urjénsia,” nia akresenta.

Bankada PLP husu VIII Governu Konstitusionál aprezenta ona Orsamentu Retifikativu, atu nune’e bele fó resposta ho efeitu sósiu-ekonómika ne’e.

Notísia Relevante: PN hein Governu aprezenta Orsamentu Retifikadu

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here