Mapa munisípiu Viqueque. Imajen/Espesiál

DILI, 26 marsu 2021 (TATOLI)–Administradór postu administrativu Uatulari, munisípiu Viqueque, Tomas da Silva, husu ba komunidade atu tuur hakmatek hodi prevene propagasaun COVID-19.

“Ha’u husu komunidade sira atu kontinua hakmatek iha ida-idak ninia uma hodi prevene moras COVID-19 labele alastra, karik nesesáriu maka sai maibé tenke uza máskara, fase liman no distánsia sosiál entre ema,” Administradór postu, hateten ba Agência TATOLI, via telefónika,  sesta ne’e.

Governu deside aplika serka sanitária no konfinamentu domisiliáriu jerál obrigatóriu iha munisípiu Baucau no Viqueque, hahú 16 to’o 29 marsu tanba rejista ona kazu pozitivu COVID-19 iha munisípiu rua ne’e no iha posibilidade estende bainhira iha evolusaun kazu ativu.

Notísia relevante: Governu impoin serka sanitária iha Baucau no Viqueque to’o 29 marsu

To’o oras ne’e, deteta ona kazu konfirmadu hamutuk 10 iha Viqueque, ne’ebé fahe ba cluster tolu hanesan aldeia Lari, suku Afaloikai, postu administrativu Uatulari, aldeia Umaneiku, suku Ossu de Cima, postu administrativu Ossu no aldeia Mamulak, suku Kuku Karaubalu, postu administrativu Viqueque villa.

Maski nune’e, autoridade postu ne’e louva komunidade Uatularia tanba bele kontribui prevene COVID-19, tanba nota katak kada loron komunidade hosi katuas-ferik to’o labarik bainhira atu hala’o atividade sempre uza máskara.

“Ha’u kontente no louva komunidade tanba kuandu sira ba fatin ne’ebé de’it, ho karreta, motór, ka la’o ain sempre uza máskara, signifika sira kontribui hamate propagasaun vírus,” nia akresenta.

Tuir nia, daudaun parte Administradór postu Uatolari rasik hamutuk ho Polísia, autoridade lokál no pesoál saúde, koordena serbisu di’ak tebes hodi prevene COVID-19.

“Durante ne’e ami serbisu di’ak tebes halo prevensaun no mitigasaun COVID-19 iha komunidade nian le’et, nune’e moras ne’e labele alastra liután,” nia hatutan.

Tama ba períodu serka sanitária, Administradór postu Uatulari hasai avizu hodi suspende prosesu aprendizajen, maski iha Rezolusaun Governu mensiona ona.

“Ha’u hasai avizu ida hodi husu prosesu aprendizajen iha eskola sira hotu iha postu administrativu Uatulari para lai no agora estudante hotu hela iha uma, bainhra rona situasaun normál ona no hein munisípiu fó fali avizu mai dehan reativa fali eskola maka ami reativa fali,” nia tenik.

Notísia relevante: Prosesu aprendizajen iha munisípiu tolu suspende durante períodu serka sanitária

Enkuantu, atendimentu iha Administrasaun Uatulari kontinua la’o normál maski iha limitasaun inklui atendimentu públiku esensiál seluk.

“Pesoál saúde kontinua halo serbisu fó atendimentu ba ema moras sira, Polísia mós  kontinua halo serbisu ho di’ak no ba serbisu administrasaun maka ami limita ema iha kantor laran ba na’in-lima de’it maka halo atendimentu tanba labele halibur ema barak,” nia hatutan.

Autoridade postu ne’e dehan, bainhira iha ema trata dokumentu ruma iha edifísiu administrasaun, tenke kumpre protokolu saúde hanesan uza máskara, fase lima no distansiamentu sosiál hosi ema.

“Kundu la kumpre protokolu saúde,  ha’u la asina sira-nia dokumentu,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here