Administradór Covalima, Francisco de Andrade Imajen/Espesiál.

DILI, 26 marsu 2021 (TATOLI)—Maske Governu liuhosi Konsellu Ministru (KM) deside no termina serka sanitária iha Covalima, maibé autoridade munisipál husu abitante sira atu kumpre nafatin regra Estadu Emerjénsia ba dala-XI ne’ebé oras ne’e la’o daudaun.

Notísia Relevante: Governu termina serka sanitária iha Covalima, exetu postu Fatumean

“Ha’u hanesan autoridade munisipál, husu ba komunidade tomak iha Covalima katak mantein nafatin regra Estadu Emerjénsia ba dala-XI ne’ebé Prezidente Repúblika dektreta ona. Ha’u fó korajen nafatin ba komunidade hotu liuliu sira-ne’ebé hela besik iha fronteira mantein nafatin kumpre regra Estadu Emerjénsia, tanba serka sanitária mak termina ona maibé Estadu Emerjénsia sei kontinua la’o hela,” Administradór Munisípiu Covalima, Francisco de Andrade, hateten ba Agência TATOLI, liuhosi telefónika, sesta ne’e.

Atu komunidade Covalima mantein nafatin regra EE, nia informa, administradór halo ona renuniaun ida ho Diretór Saúde, PNTL no ministériu sira seluk atu fó avizu nafatin ba abitante sira atu bele kumpre regra tuir protokolu hosi Organizasaun Mundiál Saude ne’ebé fó sai hosi Ministériu Saúde (MS) hanesan distánsia sosiál, fase liman ho sabun ka uza hand sanitizer no uza máskara bainhira la’o sai ba fatin públiku.

“Ha’u husu komunidade Covalima tomak nia konsiénsia atu kumpre nafatin EE, tanba ita-nia munisípiu foin livre hosi kazu transmisaun lokál ba COVID-19 nian. Ida-ne’e presiza ita hotu-nia kompreensaun, nune’e labele hamosu fila-fali pozitivu ba COVID-19. Tanba, ho ita nia moto ne’ebé dehan ‘saúde iha ita-nia liman rasik’, entaun ba moras COVID-19 ne’e di’ak prevene antes duke kura,” nia hateten.

Nia infroma, daudaun ne’e movimentu ema no transporte públiku la’o normál fali ona hanesan loron baibain maibé abitante sira sei nafatin la’o tuir regra hosi Estadu Emerjénsia nian hodi labele halibur malu liu ema na’in-10 ba leten.

“Atividade kona-ba movimentu ema no transporte la’o normál hanesan baibain. Maibé, iha ne’e, abitante sira nafatin kumprea regra EE nian. Iha ne’e, atividade eskolár, ita deside sei suspende nafatin,” nia dehan.

Kona-ba seguransa iha munisípiu Covalima liuliu ba fronteira sira nia dehan, hanesan fronteira, Fatumean, Tilomar no Tafu-lulik, daudaun ne’e seguransa sei mantein nafatin hodi antesipa ema ilegál tama-sai iha Munisípiu Covalima.

Notísia Relevante: CIGC seidauk deside retira Forsa Unidade Territoriál iha Covalima

Jornalista: Arminda Fonseca 

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here