Arguidu sira partisipa iha primeira interrogatóriu iha Tribunál Distritál Dili (TDD), kinta (25/03). Imajen Tatoli/Nelson de Sousa

DILI, 25 marsu 2021 (TATOLI)-Ministériu Públiku (MP) liuhosi audensia julgamentu primeira interrogatóriu iha Tribunál Distritál Dili (TDD), kinta ne’e, akuza arguidu  na’in-hitu (7) ne’ebé tortura joven na’in-rua ho krime lima.

Ministériu Públiku nu’udar na’in ba asaun penál ne’ebé reprezenta hosi Prokuradór Matias Soares ho Prokuradora Lidia Soares, imputa krime lima ne’e ba arguidu sira maka hanesan krime sekuestru previstu iha artigu 160, Raptu previstu iha  artigu 161, violasaun ba domisíliu previstu iha artigu 185, krime organizadu, asosiasaun kriminoza previstu iha artigu 188 no hotu-hotu iha  kódigu penál Timor-Leste.

Notísia Relevante : Tortura joven na’in-rua, Polísia lori arguidu sira ba hatán iha Tribunál

Advogadu privadu Octavio Cardoso, ne’ebé fó asisténsia legal ba arguidu na’in-hitu ho inisiál  DDJ, AS, JG, JODC, CM, ALBDC no MS, hateten tuir faktu MP aprezenta ba Tribunál katak arguidu sira  iha indísiu krime relasiona halo vídeo la’o tuir dalan ba to’o iha fatin akontesimentu.

Nia dehan, iha alegasaun tuir indísiu ne’ebé  MP aprezenta, maibé parte defeza aprezenta katak atu prenxe elementu krime sira ne’ebé iha, fila-fali ba  Tribunál nia desizaun ka medida saida mak merese fó ba arguidu sira.

Prosesu primeiru interrogatóriu ne’e hahú iha tuku 11:10 intervalu iha tuku 13:30 Otl, no kontinua fila-fali iha tuku 14:30 to’o iha tuku 17:30 Otl, maibé seidauk iha desizaun no Tribunál adia fila-fali ba iha sesta aban (26/03) hodi rona desizaun.

Tuir observasaun Agência Tatoli hafoin remata primeiru interrogatóriu iha lokraik ne’e membru polísia sira lori hikas arguidu sira fila-fali ba komandu PNTL Dili.

Audiénsia primeiru interrogatóriu ne’e prezide hosi juiz Maria Solana no arguidu sira hetan asisténsia legál hosi advogadu privadu na’in-tolu; Octavio Cardoso, Ismael Asunção Lopes ho Marito da Costa.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here