Mapa hatudu área konjunta no kampu Greater Sunrise. Imajen/Espesiál

DILI, 25 marsu 2021 (TATOLI)-Prezidente Autoridade Nasionál Petróleu no Minerál (ANPM), Florentino Soares Ferreira, informa, Estadu Timor-Leste no Austrália, finaliza ona dokumentu enkuadramentu hodi fó biban diskute planu dezenvolvimentu Greater Sunrise.

“Ami finaliza ona dokumentu enkudramentu balun hanesan kódigu mineiru ba petróleu no ami halo revizaun hela,” Prezidente ANPM hateten iha Otél Novo Turismo, Lecidere, Dili, kinta ne’e.

Estadu Timor-Leste liuhosi Timor GAP halo parte ona iha konsórsiu iha kampu petrolífera, Greater Sunrise ho partisipasaun maioria 56,56%, Woodside (operadora) 33,44% no Osaka Gas 10%.

Tuir Dirijente, kona-ba revizaun, parte Timor-Leste no Austrália daudaun simu hela opiniaun  hosi empreza konsórsiu sira.

“Ita simu hela sira-nia komentáriu no ita mós fó fali ita-nia komentáriu no diskusaun la’o nafatin hafoin mak ita finaliza,” nia akresenta.

Nia hatutan, parte Austrália diskute enkudramentu fiskál no operasionál hodi fasilita empreza konsórsiu sira halo planu dezenvolvimentu ba kampu Greater Sunrise.

Enkuantu, Estadu Timor-Leste liuhosi ANPM pro-ativu tebes hala’o diskusaun no iha abríl bele tuur filafali ho Austrália atu kontinua diskute no finaliza enkudramentu fiskál no operasionál.

“Ami hamutuk ho ekipa Ministériu Petróleu no Minerál tomak halo reniaun dala haat ona ho Austrália inklui empreza konsórsiu sira iha konsórsiu Greater Sunrise atu hatuur enkuadramentu legál, fiskál no operasionál ne’ebé laiha ona aspetu polítiku iha laran,” Dirijente autoridade dejignada ne’e haktuir.

Tuir Prezidente ANPM, atu dada kadoras mai Timor-Leste ka Austrália, depende planu dezenvolvimentu, hafoin nasaun rua hatuur ona enkuadramentu legál sira.

Governu Timor-Leste presiza hatuur enkudramentu legál atubele ko’alia kadoras dada bá nasaun ne’ebé, tanba Estadu rua labele deside diretamente.

“Empreza konsórsiu ka operadór sira mak hamosu planu dezenvolvimentu, liuliu haree ba vantajen komersiál no halo kalkulasaun hodi deside bá Austrália ka mai Timor-Leste, hafoin sira hatama mai Estadu rua atu deside pozisaun ne’ebé Timor-GAP mak tenke marka ita-nia posizaun,” nia esplika.

Tuir tratadu fronteira marítima iha anexu B, artigu 2, hatuur kona-ba Greater Sunrise nia estatutu no mós partilla persentajen katak bainhira dada kadoras bá Austrália mak Timor-Leste hetan 80% no Austrália 20%, enkuantu dada mai Timor-Leste hetan 70% no Austrália hetan 30%.

Nune’e, Estadu rua ne’e favorese atu kampu ne’e bele dezenvolve hodi halo esplorasaun no produsaun ne’ebé sedu liu atu dehan dada kadoras ba nasaun ne’ebé.

Maski nune’e, ANPM nia posizaun atu serbisu ho baze interese Timor-Leste, tanba hanesan autoridade dejignada sei halo kontrolu  ba kampu petrolíferu.

“ANPM prefere kampu Greater Sunrise ne’e dada mai Timor-Leste tanba ita mak autoridade dejignada, ne’ebé dada ba Austrália ita atu kontrola la di’ak,” nia katak.

Jornalista: Florêncio Miranda Ximenes

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here