Estudante hosi Eskola Sekundáriu Santo António Baucau. Imajen Espesiál.

DILI, 25 marsu 2021 (TATOLI)—Servisu Munisipál Edukasaun Baucau (SMEB) suspende provizóriu prosesu aprendizajen iha Munisípiu Baucau hahú hosi 16-29 marsu, bazea ba desizaun Governu impoin serka sanitária no konfinamentu obrigatóriu ba Munisípiu Baucau no Viqueque hahú iha oras 00:00 loron 15 marsu to’o oras 23:59 loron 29 marsu 2021.

Notísia Relevante: Governu impoin serka sanitária iha Baucau no Viqueque to’o 29 marsu

Iha situasaun serka sanitaria no konfinamentu obrigatóriu ne’e, Servisu Munisípal Edukasaun Baucau fó orientasaun ba eskola sira atu kria grupu WhatsApp (WA), atu fasilita estudante sira tuir nafatin prosesu aprendizajen.

“Iha serka sanitaria no konfinamentu obrigatóriu ne’e, ami fó orientasaun ba diretór eskola sira iha Munisípiu Baucau atu kria grupu WhtasApp (WA), atu fasilita estudante sira tuir nafatin prosesu aprendizajen liuhosi grupu refere. Maibé, iha ne’e, diretór eskola katólika sira mak konsege kria grupu WhatsApp hodi fasilita prosesu aprendizajen ba estudante sira, atu bele aumenta estudante sira-nia koñesimentu no abilidde atu iha hanoin estuda no estuda beibeik,” Diretór Servisu Munisipál Edukasaun Baucau, Feliz Ximenes, informa ba Agência TATOLI liuhosi telefónika, kinta ne’e.

Hosi orientasaun ne’e, nia hateten, eskola katólika sira-ne’ebé iha inisiativa kria grupu WhatsApp mak; Eskola Pré-Eskolár, Ensinu Sekundáriu Katólika Teulale ho STM Fatumaca, Eskola Pre-Sekundária Santa Ursula no Eskola Sagrado Coração de Jesus (SACROJES) Vila Nova Baucau, hodi fasilita estudante sira kontinua tuir prosesu aprendizajen ho sira-nia fasilidade rasik.

Eskola públiku sira lebele kria grupu WA tanba ambiente eskola públiku maiória mak fasilidade la sufisiente, maibé iha tempu serka sanitaria ne’e profesór sira nafatin fó materia eskola nian liuhosi dalan seluk.  

“Problema ida mak telefone no liña eletrisidade laiha. Rede internete dezde tinan kotuk to’o mai tinan ida-ne’e, susar tebes. Maibé, kuaze eskola hotu iha Baucau laran, iha implementasaun serka sanitaria ne’e, professór sira fó ezersísiu, foto kópia matéria sira fó ba sira-nia estudante sira atu estuda iha uma. Ida-ne’e parte di’ak tanba estudante ida-idak bele prepara no estuda mesa-mesak iha uma,” nia dehan.

Notísia Relevante: Prosesu aprendizajen iha munisípiu tolu suspende durante períodu serka sanitária

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here