Atividade Petrolífera iha kampu Bayu-Undan. Imajen/Conocophillips

DILI, 25 marsu 2021 (TATOLI)—Autoridade Nasionál Petróleu no Minerál (ANPM) no empreza australiana, Santos Limited hahú halo ona preparasaun tékniku iha kampu petrolíferu, Bayu-Undan atu halo perfurasaun iha inísiu juñu tinan ne’e.

“Ami halo preparasaun lubuk ida ona ein termu haree soldajen sira ne’ebé atu fura, serbisu la’o nafatin no ita espera katak iha juñu bele halo perfurasaun ba postu tolu iha kampu Bayu-Undan,” Prezidente ANPM, Florentino Soares Ferreira, informa ba Agência TATOLI, iha Otél Novo Turismo, Lecidere, kinta ne’e.

Empreza Santos hanesan operadór konsórsiu iha kampu Bayu-Undan, ne’ebé iha janeiru tinan ne’e anunsia ona desizaun halo investimentu ho montante millaun $235 ba projetu perfurasaun mina-matan tolu iha kampu petrolíferu.

Notísia relevante: Santos deside investe millaun $235 fura mina-matan tolu iha Bayu-undan

Prezidente ANPM dehan, tuir planu, inísiu abríl to’o maiu bele halo ona mobilizasaun hodi halo perfurasaun.

Projetu ne’e ho previzaun sei extende tan durasaun operasaun iha kampu petrolíferu to’o tinan 2023, otimiza rekuperasaun kampu no fornese valór signifikante ba Timor-Leste, liuhosi produsaun ba instalasaun offshore no planta Darwin LNG.

Programa perfurasaun kompostu hosi postu produsaun tolu hanesan rua iha plataforma tasi laran no  ida iha tasi okos,  hodi dezenvolve rezerva adisionál gás naturál no líkidu hodi estende vida iha kampu, ne’ebé bainhira laiha ona atividade sei desmantela.

Aprovasaun projetu ne’e sei menus hosi fulan-hitu, hafoin empreza Santos ofisiálmente sai operadór no parseiru iha Bayu-Undan hafoin finaliza sosa asaun ativa ConocoPhillips  iha Norte Austrália no Timor-Leste.

Posu hirak ne’e sei fura ho plataforma jack-up Noble Tom Prosser,  ne’ebé tuir planu sei realiza iha trimestre daruak tinan ne’e hadi fó produsaun iha trimestre tuir mai tinan ne’e.

Programa perfurasaun ho previzaun sei hetan millaun $20 barríl resin, ne’ebé hanesan rezerva bruto óleu no produsaun kustu fronesimentu kiik, estende durasaun útil  Bayu-Undan, redús períodu Darwin LNG, antes projetu Barossa hahú operasaun.

Daudaun, empreza Santos Limited iha partisipasaun 68,4% iha kampu Bayu-Undan no iha Darwin LNG sei redús ba 43,4%, hafoin konluzaun fa’an 25%  ba SK E&S.

Iha loron 28 maiu 2020, ConocoPhilips finaliza ona prosesu fa’an ativu petrolífera ba empreza Santos Limited, ne’ebé lokaliza iha Norte Austrália.

Durante ne’e, Projetu Bayu-Undan kontribui ona reseita ba Estadu Timor-Leste, iha Fundu Petrolíferu ne’ebé to’o agora hamutuk biliaun $20-resin.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here