Ilustrasaun IRA. Imajen/Espesiál

DILI, 25 marsu 2021 (TATOLI)—Xefe Sentru Saúde Postu Administrativu Iliomar, Munisípiu Lautém, Narcisio Camões, informa hosi fulan jeneiru no favereiru tinan ne’e, moras ne’ebé rejistu aas liu iha Sentru Saúde Iliomar mak moras Infesaun Vias Respiratóriu Aguda (IRA).

 “Durante fulan janeiru-fevereiru 2021, ita rekolla dadus hahú hosi Sentru saúde Iliomar to’o ba Postu saúde haat, rejistu moras aas liu mak infesaun vias respitatóriu aguda na’in-564, diarea na’in-413, no moras seluk hamutuk na’in 2.037,” Xefe Sentru Saúde Postu Administrativu Iliomar, Narcisio Camões, informa ba Agência TATOLI liuhosi telefónika, kinta ne’e.

Kauza hosi moras infesaun vias respiratóriu ne’e, nia dehan, afeta hosi klima hanesan tempu udan no mós hosi ahi-su’ar tanba komunidade barak mak tein uza ai-sunu, sigaru nia su’ar, rai rahun su’ar no ijiéne pesoál.

Nia haktuir, pasiente ne’ebé afeta ba moras infesaun vias respiratóriu aguda ne’e hahú hosi idade zero to’o to’o tinan lima inklui idozu sira, maibé pasiente sira-ne’e hosi pesoál saúde halo atendimentu ne’ebé di’ak entaun sira-nia kondisaun rekoperadu hotu ona.

Atu prevene moras hirak ne’e, nia dehan, daudaun ne’e sira halo halo sensibilizasaun no promosaun saúde nian ba komunidade bazeia polítika hosi Ministériu Saúde Munisipál liuhosi programa “Vizita Família”.

Xefe Sentru Saúde Iliomar, Narcisio Camões. Imajen/Espesiál.

“Atu miniiza ka prevene moras sira-ne’e mak ami hala’o programa ida bolu vizita família. Programa ida-ne’e, oinsá pesoál saúde sira habesik aan ba ita-nia komunidade atu fahe informasaun saúde nian ba sira liuliu oinsá bele moris iha ijiéne nia laran ko’alia mós kona-ba nutrisaun di’ak ba labarik sira, no mós aproveita konsulta ita-nia komunidade,” nia dehan.

Nia informa, Sentru Saúde Postu Administrativu Iliomár iha ninia Postu Saúde haat mak hanesan Postu Saúde Iradarate, Tirilolo, Maluhira no Kaidabu.

Moras Infesaun Vias Respiratória Aguda (IRA)

Moras infesaun Vias Respiratóriu Aguda (IRA) mak infesaun viral (infeksaun ne’ebé kauza hosi virus) ne’ebé akontese iha ita-nia dalan iis. Bainhira ita dada iis anin sei halai tuir ita-nia dalan iis antes to’o iha pulmaun. Normalmente ita-nia dalan iis hahú ka forma hosi Inus, Kavidade nasal (inus kuak), faringe no laringe (kanál rua ne’ebé nia lokalizasaun iha kakorok).

Anin sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha ita-nia dalan-iis sei provoka ka halo ita sente susar no la konfortavél bainhira dada iis, no nu’udar konsekuénsia sei halo ita-nia isin falta anin hodi hala’o nia funsaun ho di’ak. Moras ida-ne’e fasil tebes da’et no fasil tebes atu kura.

Kauza hosi Infesaun Vias Respiratória Aguda

Moras IRA kauza hosi virus no bakteria ne’ebé invade diretamente ita-nia dalan iis liuhosi matan, inus no ibun. Virus sira-ne’ebé hamosu moras ne’e mak hanesan Rhinovirus, Coronavirus, Virus parainfluenza, no adenovirus.

Fatór sira-ne’ebé kontribui hetan moras IRA

Fatór sira-ne’ebé kontribui atu hetan moras IRA mak hanesan (1) Relasaun ho Individu; Laabarik sira-ne’ebé la simu imunizasaun, bebé ne’ebé la hetan susu hosi inan, bebé no labarik sira menór ho idade tinan ida, sistema imunolojia fraku (daya tahan tubuh lemah), má nutrisaun, moras krónika, ijiéne pesoál ne’ebé la di’ak.  

Relasiona ho Ambiente mak; Mudansa temperatura ambientál, poluisaun (rai-rahun), asinamentu (kepadatan, overcrowding), falta de ventilasaun iha uma, fumadór barak (suar hosi sigaru bele hasae insidénsia ba moras ne’e), no ahi-su’ar.

Transmisaun

Moras Infesaun Vias Respiratóriu Aguda (IRA) transmite ka da’et da’et liuhosi kontaktu direta (koali’a, fani, kabeen) ho ema ne’ebé hetan tiha ona moras ne’e.

Sintóma

Moras Infesaun Vias Respiratóriu Aguda (IRA) sei hatudu sinál no sintóma hanesan; Inus be’en ka metin, me’ar (me’ar maran), isin kolen ka baruk, isin manas (dalaruma), garganta moras, no ulun moras (dalaruma).

Tratamentu

Tratamentu ba iha moras infesaun vias respiratóriu aguda (IRA) iha oin rua (2) mak; Tratamentu medikamentoza (ho aimoruk), no tratamentu non-medicamentosa (la uza ai-moruk). Tratamentu medikamentoza (ho aimoruk): médiku sira mak sei fó aimoruk bainhira ita ba hala’o konsulta iha sentru saúde kai ha ospitál. Tratamentu non-medikamentoza (tratamentu la ho ai-moruk): tratamentu ne’ebé prátiku no ita bela halo hanesan suas ho bee manas nia suar, hemu bee no jus barak, deskansa barak no selu-seluk tan.

Prevensaun

Moras infesaun vias respiratóriu fasil tebes atu kona ema maibé fasil tebes mós atu prevene, se ita iha konsiénsa no kultura saudavel. Asaun ka hahalok sira-ne’ebé ita tenke halo hodi prevene moras ne’e mak hanesan; Fase liman ho sabaun, hadook aan hosi ahi-su’ar no rai-rahun, taka inus no ibun bainhira fanin ka me’ar, susu-been ekskluzive ba bebé foin moris to’o fulan ne’en (6), labele fuma besik, halo vasinasaun, no kuidadu ijiéne pesoál.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here