Ministru Administrasaun Estatal (MAE), Miguel Pereira de Carvalho . Imajen/Media MAE.

DILI, 25 marsu 2021 (TATOLI)—Ministru Administrasaun Estatál, Miguel Pereira de Carvalho, hateten realizasun eleisaun ba prezidente autoridade munisipál no membru asembleia munisipál depende ba pakote lejislativa haat sai lei.

Pakote lejislativa haat (4) ne’e kompostu hosi lei podér lokál, lei finansa munisipál, lei eleisaun munisipál no lei divizaun administrativa territóriu.

“Bainhira pakote lejislativa hirak ne’e aprovadu entaun di’ak ona, tanba Estadu iha ona enkuadramentu legál atu bele instala munisípiu sira iha territóriu nasionál. Tanba, Estadu iha ona kondisaun hotu atu bele realiza eleisaun lokál ba prezidente autoridade no mós eleisaun ba membru asembleia munisipál (deputadu lokál) nune’e ita lori dezenvolvimentu ba to’o iha kraik,” Ministru Administrasaun Estatal infoma ba jornalista sira, iha Parlamentu Nasionál, kinta ne’e.

Kona-ba lei podér lokál no eleisaun munisipál, nia informa, oras ne’e tama ona konsultasaun públika hosi Komisaun A (Justisa no Konstitusionál) ba munisípiu sira, lei divizaun administrativa tama ona iha Parlamentu Nasionál, hela de’it mak lei finansa munisipál.

Nia hatutan, pakote lejislativa hirak ne’e kuandu aprova ona bele lori desentralizasaun administrative ba munisípiu sira iha territóriu nasionál.

“Hodi mellora servisu públiku sira no ita bele lori rabat ona dezenvolvimentu ba komunidade sira,” nia dehan.

Ministru Administrasaun Estatal ne’e hakarak pakote lejizlativa haat ne’e tenke aprova iha tinan fiskál ida-ne’e.

Pakote lejislativa hirak ne’e halo bazea Konstituisaun RDTL artigu 71 no 72. Konsituisaun RDTL artigu 71 (Organizasaun administrativa) alínea 1, hateten Governu sentrál tenke iha reprezentasaun hosi nível eskalaun administrativu oin-oin iha rai-laran.

Alínea 2 hosi artigu ne’e kumpre tanba Oé-Cusse Ambeno sei hala’o nia knaar tuir polítika administrativa ho rejime ekonómiku espesiál no alínea 3 Ataúro sei iha estatutu ekonómiku rasik.

Alínea 4 hosi artigu ne’e mós hateten, organizasaun polítika-administrativa rai Repúblika Demokrátika Timór-Leste nian sei define tuir lei.

Entretantu artigu 72 (Podér lokál) hosi Konstituisaun RDTL, alínea 1 mensiona, sei harii kbiit lokál ho ema ne’ebé koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun idak-idak nian kona-ba solusaun problema rasik iha sira-nia komunidade no atu promove dezenvolvimentu lokál, no la afeta partisipasaun Estadu nian.

Alínea 2 hosi artigu 71 ne’e hatutan, organizasaun, kompeténsia, funsionamentu no kompozisaun órgaun kbiit lokál nian sei define tuir lei.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here