Ilustrasaun COVID-19/Espesial.

DILI, 25 marsu 2021 (TATOLI)—Diretór Saúde Munisipál Baucau, Leonel Guterres, informa agora daudaun Sentru Saúde Uailili no Riamari taka provizóriu ba públiku tanba pesoál saúde sira-ne’ebé servisu iha sentru saúde refere identifikadu pozitivu COVID-19.

Notísia Relevante: COVID-19: Ekipa konjunta saúde Baucau kontinua halo vijilánsia ba área afetadu

“Dezde ita-nia pesoál saúde fatin refere submete identifika pozitivu COVID-19, Sentru Saúde Uailili no Riamari taka provizóriu ba públiku hodi labele atende pasiente sira iha serka sanitária nia laran,” Leonel Guterres informa ba Agência TATOLI, liuhosi telefónika, kinta ne’e.

Diretór ne’e hateten, ba pesoál saúde sira-ne’ebé pozitivu COVID-19 haruka kedas ba halo tratamentu iha fatin izolamentu iha Dili.  

Durante sentru sentru saúde rua ne’e taka provizóriu, nia informa, pasiente sira hosi fatin rua refere ba halo tratamentu saúde iha Postu Saúde COVID-19 nian iha Tirilolo.

Ho kazu hirak ne’e, nia haktuir, Sentru Saúde Baucau kontinua halo sensibilizasaun no promosaun tama sai aldeia hodi esplika kona-ba prevensaun moras COVID-19 nian ba abitante sira hotu iha Munisípiu Baucau.

“Ami Sentru Saúde Baucau dezde COVID-19 mosu iha 2020, ami komesa halo promosaun prevensaun ba ita-nia populasaun sira iha Baucau no to’o fulan marsu tinan ne’e, ita konsege halo promosaun ba aldeia hamutuk 281 ona,” nia hateten.

Tanba ne’e, nia apela ba abitante sira hotu iha bairru, aldeia, suku, postu administrativu sira atu kuidadu-aan no uza máskara bainhira nesesidade sai ba liur, fase liman beibeik bainhira halo atividade ruma no tenke halo distansiamentu sosiál no fíziku liu metru ida hosi ema ida ba ema seluk.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here