DILI, 25 marsu 2021 (TATOLI)—Serbisu Edukasaun Munisípiu Manatuto (SEMM), deside provizoriamente suspende aula prezensiál ba estudante na’in 40 hosi Suku Vemase Tasi, Postu Administrativu Vemase, Munisipiu Baucau.

Estudante na’in 40 ne’e, na’in 20 hala’o estudu iha eskola Ensino Basico Central (EBC) Lay-Doe no na’in 20 iha Ensino Secundario Geral (ESG) Primeira Dama Kirsty Sword Gusmão Laleia, Postu Administrativu Laleia, Munisípiu Manatuto.

Notísia relevante:COVID-19: pozitivu foun 21, ativu 247

Diretór Serbisu Edukasaun Munisípiu Manatuto, Eduardo Guterres, hateten parte SEMM deside temporariamente estudante hirak ne’e no autoriza nafatin atu eskola hosi uma, nune’e evita transmisaun COVID-19, tanba abitante balun iha Munisípiu Baucau detetadu pozitivu COVID-19, tuir relatóriu Sala Situação Centro Integrado Gestão de Crise (SS-CIGC).

“Estudante na’in 40 ne’e mai hosi Vemase, nune’e ita hapara lai sira-nia prezensa iha eskola rua ne’e, atu asegura estudante-sira seluk, iha Munisípiu Manatuto liuliu área Laleia,” Eduardo Guterres hateten ba jornalista Agência Tatoli via telefónika, kinta ne’e.

Maski estudante hirak ne’e la marka prezensa iha eskola, maibé SEMM serbisu hamutuk ho parte eskola atu oinsa bele hetan nafatin matéria liu hosi online liuliu fasilita liu hosi grupu whatsApp.

“Desizaun ne’e ita foti atu asegura ita hotu nia saúde hosi moras aat ne’e. Tanba ne’e ita mós husu ba estudante sira ne’e atu hakmatek iha uma, to’o situasaun normál,” nia subliña.

Kona-bá prosesu aprendizazen iha Munisípiu ne’e, la’o hanesan baibain, liuliu atividade iha eskola rua ne’e la’o normál.

Totál estudante hosi eskola rua ne’e hamutuk 285, hosi EBC Lay-Doe 109 no ESG Primeira Dama Kirsty Sword Gusmão Laleia na’in 176.

Dadus jerál hosi Sala Situação Centro Integrado Gestão de Crise (SS-CIGC), to’o kuarta 24 marsu 2021, rejista tan kazu pozitivu foun COVID-19 na’in 21 ne’ebé detetadu hosi munisípiu Dili ho Baucau, no númeru pasiente ne’ebé baixa hamutuk 247.

Evolusaun COVID-19 iha Munisípiu Baucau, iha 24 marsu,  iha kazu foun ida no kazu ida ne’e, kontaktu besik hosi aldeia Builé Suku Babú.

Oras ne’e daudaun, iha ona kazu 20 detetadu iha Munisípiu Baucau, iha cluster hitu, tuir foku propagasaun totál kumulativu kazu konfirmadu hahú hosi 2, 13, 14, 17, 19, 21, 23 no 24 marsu, aldeia Lutumutu, Suku Tirilolo haat, aldeia Caiubilale, suku Caibada ida, aldeia Afagua, suku Wailili tolu, aldeia Casmuto, suku Buruma ida, aldeia Lamegua, suku Bahu ida, aldeia Buile, Suku Bahu rua, aldeia Builai, Suku Buibau ualu.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here