Diretór SS-CIGC, Brigadeiru Jenerál, João Miranda “Aluc Descartes” hala’o enkontru ho Komandante Jerál Polisia Nasionál Timor-Leste (PNTL), Komisáriu Polisia, Faustino da Costa no Vise-Ministru Interiór, António Armindo. Imajen/PNTL

DILI, 25 marsu 2021 (TATOLI) – Diretór Sala Situasaun Sentru Integradu Jestaun Krize (SS-CIGC), Brigadeiru Jenerál, João Miranda “Aluc Descartes”, kinta ne’e, hala’o enkontru ho Vise-Ministru Interiór, António Armindo ho Komandante Jerál Polísia Nasionál Timor-Leste (PNTL), Komisáriu Faustino da Costa no segundu Komandante Jerál PNTL, Komisáriu Mateus Fernandes, hodi trasa kooperasaun servisu atu apoia malu iha luta kombate propagasaun COVID-19 iha Timor-Leste.

Komisáriu Faustino da Costa, informa enkontru ne’e hodi avalia fila fali servisu sira ne’ebé polisia hala’o ona hodi implementa serka sanitária iha Munisípiu Dili, Baucau no Viqueque.

“Ami halo koordenasaun kona-ba apoiu forsa polísia nian iha Sala Situasaun no ajuda ekipa frontline COVID-19 no haree mós ba futuru ne’ebé liga ho implikasaun administrativa nian,” Komisáriu Faustino  da Costa, hateten ba jornalista sira iha Komandu Jerál PNTL, Caicoli, Dili.

Komandu PNTL Dili rasik koloka ona membru polísia sira hodi asegura seguransa ho membru F-FDTL iha Munisípiu Covalima, Bobonaro, Oe-cusse no agora estabelese tan forsa PNTL no F-FDTL iha ba Baucau ho Viqueque, hodi gasante abitante sira kumpre serka sanitaria no konfinamentu, nune’e evita propagasaun COVID-19 iha kumunidade.

Komandu PNTL apela mós ba abitante sira bainhira atu halo vizita ba munisípiu tenke husu hetan autorizasaun hosi SS-SIGC hodi bele hala’o viajen.

“Ba abitante sira ne’ebé halo viajen hosi Dili ba munisípiu no hosi munisípiu mai Dili, maka   la iha karta autorizasaun hosi SS-CIGC, PNTL sei la fó,” Komisáriu Faustino da Costa afirma.

Iha parte seluk, Komandante PNTL ne’e apela mós ba abitante sira iha kapitál Dili, liu-liu grupu juventude sira atu evita kria problema hodi kontribui ba estabilidade nasionál.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here