Ministru Obra Públika, Salvador Eugênio Soares dos Reis Pires, halo intervensaun gravadu iha Asembleia Jerál altu nível ONU, iha Nova Iorke, segunda (22/03). Imajen/ONU

DILI, 25 marsu 2021 (TATOLI)-Ministru Obra Públika (MOP), Salvador Eugênio Soares dos Reis Pires, reprezenta Governu Timor-Leste hato’o intervensaun gravadu iha Asembleia Jerál altu nível kona-ba implementasaun Objetivu Dezenvolvimentu Sustentável (ODS) númeru 6 bee no saneamentu no alvu ajenda 2030.

Fórum globál ne’e realiza iha loron 18 marsu no kontinua iha 22 marsu, hodi rona Pre-recorder statement hosi Estadu membru sira, iha Kuartel Jerál Organizasaun Nasaun Unida (ONU) iha Nova Iorke.

Durante intervensaun, Ministru Salvador relata kona-ba Governu nia esforsu inklui progresu ne’ebé la’o daudaun (ongoing project), lejizlasaun, dezafiu no rekomendasaun hanesan mós nasaun seluk, tanba situasaun COVID-19 halo nasaun membru sira labele partisipa direta iha reuniaun refere.

“Estadu Timor-Leste iha planu estratejia dezenvolvimentu atu subliña aspirasaun hodi kondisiona nasaun prósperu no forte, inklui planu identifika meta 2030, katak sidadaun hotu tenke asesu ba bee-moos no sanitáriu. Ami halo ona progresu lubun ida iha rai-laran,” Ministru Salvador halo intervesaun, hanesan haktui iha nota ne’ebé Agência TATOLI asesu, kinta ne’e.

Goverante ne’e konta tuir, VIII Governu Konstitusionál ne’ebé lidera hosi Primeiru Ministru, Taur Matan Ruak, aplika ‘asesu ba bee-moos’ hanesan prioridade dahuluk entre prioridade sira seluk.

Tanba ne’e, iha planu Governu ba tinan lima, identifika investimentu ne’ebé maka presiza ba fornesementu bee-moos no sanitáriu, nune’e mós lejizlasaun nesesáriu ba setór dezenvolvimentu institusionál.

Nia haktuir, iha sensu tinan 2015 hatudu katak sidadaun asesu ba dezenvolvimentu bee-moos iha área urbana hamutuk 92% no kuaze 75% iha rai laran, enkuantu asesu ba sanitáriu besik 81% iha urbana no 62% iha rurál.

“Governu halo ona dekretu-lei balun no regra sira ba manajementu bee-moos no dekretu-lei ba kualidade kontrola bee-moos ba konsumidór sira, estabelese utilizadór públiku nasionál, inklui  reguladór ba sistema bee-moos no sanitasaun,” nia hatutan.

Nune’e mós, Governu investe signifikaviamente iha setór bee-moos iha munisípiu 12, ne’ebé foku ba sistema substansiamentu bee-moos no halo planu mestre ba iha munisípiu atu implementa iha futuru.

Aleinde ne’e, prepara ona abastesimentu bee-moos no planu investimentu ba sanitasaun iha rai-laran ho totál kustu estimasaun biliaun $1,3 ba períodu tinan 10.

Atu responde ba pandemia globál, Ministru subliña, Governu hamutuk ho parseiru dezenvolvimentu sira prepara bee-moos  iha fatin públiku sira liuliu monta bee tanke atu komunidade sira bele fase liman hodi prevene-an hosi propagasaun COVID-19.

“Maski ho progresu di’ak, maibé dezafiu mós sei barak tanba infrestrutura ne’ebé maka la adekuadu, klima, kualidade no rentabilidade servisu ne’ebé dook hosi espetativa tanba menus rekursu, investimentu, enkuadramentu legál, no konsiénsia komunidade menus bainhira uza bee-moos no proteje bee matan,” nia akresenta.

Timor-Leste mós iha ona planu ba dezenvolvimentu setór ídriku ne’ebé maka integradu atu bele garantia katak sidadaun sira la hela iha kotuk tanba aplika reforma no dezenvolvimentu institusionál hodi resposta lalais ba nesesidade públika liga ba bee no saneamentu.

Reprezentante Governu ne’e tenik, situasaun COVID-19 afeta tebes ba atividade hotu relasiona ho bee-moos, maibé kontinua serbisu hamutuk ho parseiru dezenvolvimentu sira hodi prepara bee-moos ba komunidade sira.

Durante sesaun, Misaun Permanente Timor-Leste iha sede ONU akompaña direta to’o ramata.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here