Prezidente Tribunál Rekursu, Deolindo dos Santos. Imajen Tatoli/Dok.

DILI, 24 marsu 2021 (TATOLI)-Prezidente Tribunál Rekursu, Deolindo dos Santos, informa maske pandemia COVID-19 no aplikasaun serka sanitaria ba Munisípiu Dili, Baucau no antes mós Covalima, maibé funsionamentu Tribunál nian normál hodi atende halo julgamentu.

Deolindo dos Santos, hatutan esforsu Tribunál Rekursu (TR), Tribunál Distritál Dili, Baucau no Covalima, kontinua funsiona normál, maibé ho forma redús tuir despaixu Konsellu Superiór Majistradu Judisiál nian.

Notísia Relevante : Serka sanitaria, TDD atende de’it kazu urjente

“Atende de’it ba prosesu sira urjente primeiru interrogatóriu, sumáriu, arguidu prezu, julgamentu kontinuasaun ne’ebé importante nune’e prova labele lakon,” Prezidente Tribunál Rekursu Deolindo dos Santos hateten ba jornalista sira iha Palásiu Prezidensiál, Dili, kuarta ne’e.

Prezidente Repúblika, Francisco Guterres ‘’Lú Olo’’  apresia serbisu Tribunál nian no  nafatin husu Tribunál atu kontinua funsiona ho kuidadu, mezmu iha situasaun difisil tanba Tribunál tenke funsiona ho plena.

Konstrusaun edifísiu foun TDD  suspende provizóriu

Iha ámbitu implementasaun serka sanitária iha Dili, Estadu mós suspende provizóriu atividade  konstrusaun ba edifísiu foun Tribunál Distritál Dili (TDD).

“Mezmu ita hakarak konstrusaun ne’e lao lais, maibé serka sanitária no konfinamentu obrigatóriu tanba situasaun COVID-19, nune’e afeta hodi suspende konstrusaun edifísiu foun TDD,” hateten  Prezidente Tribunál Rekursu, Deolindo dos Santos.

Lansamentu konstrusaun edifísiu foun TDD ne’e hahú iha loron 25 novembru 2020, nia progresu la’o di’ak no hetan fiskalizasaun ka monitorizasaun hosi jestaun projetu ho rigorozu atu bele garante nia kualidade tuir kontratu ka dezeñu ne’ebé iha.

Edifísiu ne’e konstrui ho andár-rua iha Caicoli no sei kompleta sala audiénsia julgamentu, servisu ofisiál justisa, juis, prokuradór, defensór, advogadu, sidadaun  no seluk tan ho espasu ne’ebé dignu.

Obra ne’e hetan supervizaun hosi Konsultan Dacrea In Association with AEC no kontraktor hosi kompañia Xina Shadong International Economic and Technical Cooperation Group.R.P ho nia montante orsamentu $10,990,769.35

Tuir termu kontratu ho kompañia exekutór katak obra ne’e  sei halo ho durasaun tempu tinan rua; 2020-2022, no tenke entrega ona ba Estadu iha fulan marsu 2022.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here