Diretór Ezekutivu PERMATIL, Ego Lemos. Imaen TATOLI/António Gonçalves

DILI, 24 marsu 2021 (TATOLI)—Diretór Ezekutivu Permakultura Timor-Leste (PERMATIL), Ego Lemos, hateten organizasaun ne’e komprometidu kolabora ho Governu hadi’a rekursu bee iha Timor-Leste.

PERMATIL hanesan organizasaun lokál ne’ebé iha papél halo konservasaun bee no rai, ne’ebé hahú ezisténsia iha 01 marsu 2001 to’o agora.

“Ami sempre koko ho rekursu saida maka ami iha atu maksimiza atividade iha kampu atubele fó impaktu pozitivu ba komunidade no nasaun. Tanba ne’e, PERMATIL kontinua lobi ho Governu inklui ajénsia internasionál sira atubele koko tau rekursu hamutuk atu hadi’a rekursu bee iha rai laran,” Diretór organizasaun ne’e dehan ba Agência TATOLI, iha ninia knaar fatin, Farol, kuarta ne’e.

Ba nia, rekursu bee importante tanba fó vantajen ba povu no nasaun,  nune’e presiza iha atensaun.

“Bainhira ita hadi’a ona rekursu bee, automátikamente sei fó vantajen ba buat barak, hanesan produsaun agrikultura sae, sistema edukasaun di’ak tanba labarik sira bele haris ho moos no saudável, bee ba família uma laran bele utiliza hakiak ikan bee midar atu hadi’a ekonomia rai laran no bele mós kontribui ba dezenvolvimentu sustentável,” nia akresenta.

Tanba ne’e, nia konsidera presiza tau rekursu hamutuk hodi hadi’a no fornese bee ba komunidade.

Durante ne’e, PERMATIL halo advokasia no kampaña ba konservasaun bee, ne’ebé halo kooperasaun forte ho Ministériu Obra Públika (MOP) liuhosi diresaun bee no saniamentu, Ministériu Agrikultura Peska (MAP), inklui Sekretaria Estadu Ambiente (SEA) hodi ko’alia kona-ba asuntu bee.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here