Primeiru-Ministru, Taur Matan Ruak, prezide reuniaun Konsellu Ministru iha salaun Ministériu Finansa, Aitarak-laran, kuarta (24/03). Imajen TATOLI/Egas Cristóvão

DILI, 24 marsu 2021 (TATOLI)–Governu delibera ona atu propoin ba Prezidente Repúblika (PR), Francisco Guterres ‘Lú Olo’, atu renova Estadu Emerjénsia (EE) ba da-XII, ba loron-30 tan.

“Governu nota iha mudansa situasaun epidemiolójika no proliferasaun ba kazu rejistadu kontájiu COVID-19, tantu iha nível rejionál no mundiál, tanba ne’e atu evita no neutraliza risku propagasaun COVID-29 no proteje saúde públika inklui iha kbiit atu hatán ba Sistema Nasionál Saúde nian, maka Governu propoin ba Prezidente Repúblika halo renovasaun Estadu Emerjénsia atu permite limita direitu no garantia fundamentál balun,” Ministru Prezidénsia Konsellu Ministru, Fidelis Manuel Leite, relata hafoin reuniaun ezekutivu iha salaun Ministériu Finansa (MF), Aitarak-laran, kuarta ne’e.

Notísia relevante: PN autoriza PR Lú Olo dekreta EE ba dala-XI

EE da-XI abranje territóriu nasionál tomak no vigora hahú oras 00:00 loron 04 marsu 2021 to’o oras 23:59 iha loron 02 abríl 2021.

“Primeiru-Ministru sei hato’o liuhosi karta pedidu ida ba Xefe Estadu hodi konvoka órgaun konstitusionál sira tuir dalan ne’ebé maka konstutuisaun rasik hatúr. Governu mós antesipa hela atu ba fali Parlamentu Nasionál iha semana oin, depende ba ajenda,” Portavós Governu akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here