Membru PN husi Bankada FRETILIN no membru Komisaun B, David Dias Ximenes "Mandati". Imajen/ António Gonçalves.

DILI, 24 marsu 2021 (TATOLI)—Membru Komisaun B ne’ebé trata asuntu Negósiu Estranjeiru, Defeza no Seguransa, Deputadu David Dias Ximenes ‘Mandati’, husu Polísia Nasionál Timor-Leste (PNTL) atu atua kualkér krime ho rápida, nune’e bele garante estabilidade iha sosiedade.

Notísia Relevante: Joven na’in-rua hetan hana no ida taa iha tilun

“Ha’u husu ba PNTL atu atua kualkér krime ho rápida hodi garantia estabilidade iha sosiedade nia leet. Estadu ne’e iha atu fó seguransa ba povu, seguransa atu iha justisa, nune’e povu hetan moris di’ak (bem estar) ho situasaun ne’ebé hakmatek. Polísia sira mak garantia seguransa maibé tenke garantia orden, garante seguransa, maibé ho trankuilidade iha sosiedade. Prezensa polísia ne’e atu proteje povu no proteje povu nia sasán, depois mak halo prevensaun no repremir (menekan) maibé respeita ba legalidade demokrátika,” Deputadu David Dias Ximenes Mandati informa ba jornalista sira, relasiona ho ikus-ikus ne’e mosu kazu baku-malu no kazu hana malu ho rama-ambon iha Sidade Dili, iha Parlamentu Nasionál, kuarta ne’e.

Nia hatutan, filozofia ba seguransa mak vizibilidade, involvimentu no profisionalizmu. Vizibilidade ne’e mosu iha-ne’ebé de’it, involvimentu ne’e mak envolve sosiedade iha seguransa, no bainhira iha ona involvimentu hosi sosiedade, entaun trankilidade mós iha sosiedade nia leet.

“Tanba saida mak iha situasaun COVID-19 no konfinamentu (lockdown) ne’e, ohin loron, iha fali buat sira-ne’e (krime), primeiru tanba vizibilidade. Ha’u fó ezemplu, ita sira-ne’e tuur hamutuk atu halo krime ida derrepente ita haree seguransa ida hamriik iha-ne’ebá, ida dehan kuidadu (polísia) iha-ne’e hela. Ne’e bolu dehan presença diz suas hora. Kuandu presença diz suas hora laiha, ema ne’e iha tendénsia atu halo duni krime. Tan ne’e mak atuasaun ne’e tenke rápida,” Deputadu Mandati hateten.

Nia esplika, Estadu bele halo lei ida forte tebes maibé laiha koasaun ema sei la kumpre.

“Ita-nia seguransa sira la halo operasaun ida-ne’ebé vizibilidade ne’e iha, ema baku-malu iha fatin ida, liu tiha kala menutu 45 mak foin mosu. Entaun, povu envolve ona (fó informasaun), lae komunidade ta’uk, keta halo polísia fila baku fali ita. Ida-ne’e mak problema ne’e mosu,” Eis Prezidente Komisaun B ne’e fó hanoin.

Nia hateten, atu ezekuta ida-ne’e ministru sira-ne’ebé kaer minsitériu seguransa no defeza tenke hatene konseitu sira-ne’e la’o no ho loloos. Tanba, nia dehan, se lae polísia foin ho karreta lian ba, ema laiha ona.

“Ne’e mak buat sira (baku malu, hana malu) kontinua mosu ne’e. Ita agora ne’e iha situasaun dilemátiku. Husik ema livre iha COVID-19, entaun ema mate. Ita aperta demais, hahan laiha ema mate. Ida-ne’e Estadu tenke buka solusaun,” nia dehan.

Tanba ne’e, nia husu Governu atu halo jestaun no abitante sira mós tenke iha obrigasaun ida-ne’ebé mak sira bele halo no ida-ne’ebé mak sira labele halo, tanba maske balun dehan Timor-Leste inventa COVID-19 maibé ne’e propagasaun mundiál ne’ebé halo nasaun sufistikadu sira mós book la ba no sorte TL seidauk iha mate.

Nia haktuir, uluk iha Indonézia nia tempu ne’e, sé mak mau-hu mós kuñese no sé mak militár (tantara) mós ema kuñese, maibé agora panemia COVID-19 ne’e la kuñese ema-ne’e mau-hu ka militár no seluk tan.

“Pás no estabilidade ha’u bele husu ba joven sira, maibé sira la haan karik estabilidade oinsá. Hamlaha ne’e, bainhira ema-ne’ebé hamlaha entaun hamosu emosaun. Laiha hahan ba kabun, frustasaun sa’e. Ha’u-nia mensajen mak ne’e, primeiru, ha’u la halo ta’uk. Segundu, ha’u gosta fasilita no ikus liu ha’u lakohi ema fahe-malu,” Deputadu Mandati fó hanoin.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here