Klibur Cacavei Lata (KCL) apoia ai-han ba estudante sira ne'ebé hela iha kost iha Dili. Imajen espesiál.

DILI, 24 marsu 2021 (TATOLI)—Klibur Cacavei Lata (KCL) ne’ebé halibur Cacavei-oan sira-ne’ebé servisu iha Díli, ohin, hola inisiativa fó apoiu solidariedade hodi fahe sasán nesesidade bázika ba estudante sira-ne’ebé hosi Suku Cacavei, Postu Administrativu Lospalos, Munisípiu Lautém, ne’ebé oras ne’e hela no aluga uma (kost) iha Dili. 

Koordenadór Jerál Klibur Cacavei Lata (KCL), Ambrósio Fernandes, kateten klibur ne’e fornese sasán nesesidade bázika ba estudante sira-ne’e atu oinsá sira bele tulun estudante sira auguenta moris iha situasaun pendemia COVID-19 liuliu implementasaun serka sanitaria no konfinamentu domisiliária iha iha Kapitál Díli.

“Apoiu ne’ebé ami halo ne’e nia ho objetivu oinsá iha situasaun serka sanitária ne’e, estudante sira bele auguenta moris tanba sira labele halo viajen ba sira-nia munisípiu foti ai-han ka osan ruma atu sustenta moris. Ho ida-ne’e mak ami nu’udár Suku Cacavei-oan, foti inisiativa fó apoiu solidaridade ba ami-nia alin sira-ne’ebé presiza ami-nia apoiu iha situasaun defisil agora ne’e,” Ambrósio Fernandes hateten ba Agência TATOLI liuhosi telefónika, kuarta ne’e.

Nia informa, dadus bosi estudante Cacavei-oan sira iha Dili ne’ebé membru Klibur Cacavei Lata sira rekolla ne’e, benefisiáriu estudante sira ne’ebé hosi Suku Cacavei ne’e totál hamutuk ema na’in-40 ne’ebé kompostu hosi feto na’in-13 no mane na’in-27.

“Sasán nesesidade bázika ne’ebé ita fó ba ita-nia alin sira mak hanesan foos, manu tolun, no mie sedaap. Hosi ita haree ba kuantidade ema-nian hanesan ema na’in-neen (6) hela hamutuk iha kost ida ne’e, sir abele simu foos saka tolu, ema ida ka rua mak hamutuk hetan saka ida (1) no ema na’in tolu (3) entaun hetan saka ida ho balun. Entre sira-ne’e akompaña ho mie sedaap ho manu tolun,” nia hateten.

Iha fatin hanesan, benefisiáriu ho naran Maria (la’ós naran loloos) agradese ba maun no mana sira hosi Suku Cacavei nian ne’ebé ho laran-kma’an hodi esforsu tau ai-han hamutuk hodi fahe ba sira.

“Ami sente triste tanba hahan laiha maibé ami sente kontente tebes tanba iha situasaun difisil hanesan, ami-nia maun no mana sira laran luak bele apoiu ai-han uiton mai ami sira-ne’ebé hela iha kost,” nia dehan.

Entretantu, benefisiáriu ho naran Anónio (la’ós naran loloos) senti kontente tebes tanba iha situasaun defisil hanesan ne’e, sira la sente mesak no sei ema laran di’ak sira-ne’ebé ho fuan no laran, sei fahe sira-nia domin liuhosi fahe sasán nesesidade bázika ba sira.

“Ami kontente tebes tanba la-sente mesak durante situasaun pandemia Covid-19 ida ne’e. Tanba, iha momentu defisil hanesan ne’e, ami hetan apoiu solidaridade hosi ami-nia maun no mana sira-ne’ebé servisu iha Dili,” nia hateten.  

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here