Primeiru-Ministru, Taur Matan Ruak, prezide reuniaun Konsellu Ministru iha salaun Ministériu Finansa, Aitarak-laran, kuarta (24/03). Imajen TATOLI/Egas Cristóvão

DILI, 24 marsu 2021 (TATOLI)—Governu liuhosi reuniaun Konsellu Ministru (KM) aprova Projetu Proposta-Lei ba alterasaun dahuluk lei númeru 14/2020, loron 29 dezembru, ne’ebé aprova Orsamentu Jerál Estadu (OJE) 2021, ne’ebé sei halo mudansa orsamentál hodi responde ba situasaun COVID-19.

Tuir Ministru Prezidénsia Konsellu Ministru, Fidelis Manuel Leite Magalhães, proposta alterasaun ne’e sei aprezenta ba Parlamentu Nasionál ho pedidu prioridade no urjénsia, hodi fó resposta ba situasaun epidemiológika COVID-19 inklui efeitu ekonómiku no sosiál sira.

“Alterasaun ne’ebé Governu propoin, sei la rekorre ba Fundu Petrolíferu, maibé atu iha alokasaun millaun $200-resin hodi responde ba nesesidade hotu durante surtu no orsamentu ne’e sei prevee ba fulan sia nia laran ho medida oin-oin,” Ministru Fidelis relata hafoin reuniaun ezekutivu iha salaun Ministériu Finansa (MF), Aitarak-laran, kuarta ne’e.

Alterasaun ne’e, sei halo reseita konsolida setór públiku administrativu sa’e ba millaun  $2,165.1 no reseita órgaun no servisu administrasaun sentrál sa’e ba millaun $1,932.5, maibé la afeta ba orsamentu Rejiaun Administrativu Espesiál Oé-cusse Ambeno no Seguransa Sosiál.

Finansia medida prinsipál neen

Tuir Portavós Governu, alterasaun ne’e atu finansia medida prinsipál neen, ne’ebé hanesan intervensaun Governu hanesan apoiu ba empregu, moratóriu kréditu, izensaun propina, akizisaun ai-han, apoiu ba profisionál liña oin sira no  medida prevensaun no mitigasaun COVID-19.

Iha medida apoiu empregu, sei prevee atribuisaun subsídiu estraórdinariu ho períodu fulan-tolu, hahú hosi marsu to’o maiu 2021, ba traballadór ne’ebé serbisu ba ema seluk ho montante ekivalente ho 70% hosi saláriu ba setór atividade nian, ne’ebé legalmente iha impedimentu halo operasaun no 50% hosi remunerasaun ba setór sira ne’ebé halo operasaun hanesan baibain.

Entidade empregadór no traballadór sira sei dispensa hosi dever pagamentu kontribuisaun sosiál relativa ho rendimentu ne’e.

“Traballadór independente sira, hanesan emprezáriu individuál sira, traballadór servisu doméstiku no ba jerente inklui administradór sira, prevee mós atribuisaun subsídiu estraordináriu ida hanesan ba períodu fulan-tolu, ekivalente ho 85% hosi valór remunerasaun konvensionál,” Ministru Fidelis esplika.

Aleinde ne’e, sei dispensa hosi dever pagamentu kontribuisaun sosiál relativa ba rendimentu ne’e, ne’ebé inklui mós medida hanesan traballadór sira ne’ebé hala’o atividade informál durante halo ba ninia formalizasaun hamutuk ho Institutu Nasionál Seguransa Nasionál.

Enkuantu, prevee mós subsídiu estraordináriu dezempregu ba traballadór inskritu sira ho kontribuisaun realiza ona ba Seguransa Sosiál, ho montante 40% hosi valór remunerasaun konvensionál relativa ho eskalaun ida ne’ebé hanesan baze insidénsia kontributiva ba Seguransa Sosiál iha adezaun fakultativa.

Ba traballadór independente sira, emprezáriu individuál sira, traballadór servisu doméstiku no ba jerente no administradór sira, prevee dispensa husi dever pagamentu kontribuisaun sosiál no atribuisaun subsídiu estraordináriu ba kompartisipasaun kona-ba kustu enerjia no renda sira.

“Ne’e atu hamenus ou rekobra kustu pagamentu empréstimu ba devedór sira, ho implementasaun moratóriu iha obrigasaun ne’ebé mosu hosi kontratu konsesaun kréditu, liuhosi adiamentu durante fulan-sia hosi vensimentu obrigasaun sira atu entrega filafali kapitál no liuhosi kompartisipasaun Estadu iha pagamentu osan-funan nian.

Governu propoin mós atu fó subsídiu ba pagamentu propina estudante ensinu superiór sira, ne’ebé labele hala’o ensinu prezensiál no montante ne’e to’o $150.

Prevee akizasaun ai-han hosi produtór nasionál sira hosi Sentru Lojístika Nasionál (CLN, sigla portugés) ba distribuisaun hosi ema no família sira ne’ebé presiza liu.

Proposta osan inklui mós medida prevensaun no mitigasaun COVID-19

Mudansa orsamentál ne’e sei utiliza mós hodi finansia medida prevensaun no mitigasaun COVID-19, liuliu relasiona ho implementasaun programa vasinasaun no akizisaun materiál barak ba teste no tratamentu moras internadu sira no konstrusaun fatin izolamentu no kuarentena foun inklui aumentu kapasidade fatin sira ne’ebé eziste ona.

Sei prevee mós osan ba apoiu ba profisionál liña oin, ba atividade Sala Situasaun Sentru Integradu Jestaun Krize (CICG, sigla portugés), programa Cesta Bázika inklui ba reforsu stock foos iha CLN.

Medida sira ne’e ezije reforsu ida iha OJE, ne’ebé konsentra aumentu dotasaun Fundu COVID-19, inklui prevee ona iha despeza tanba inskrisaun saldu jerénsia ne’ebé apuradu iha ezersísiu tinan 2020 nia rohan.

Maski nune’e, la inskreve iha OJE 2021 no mós iha realokasaun dotasaun orsamentál sira entre servisu sira, hahú husi Dotasaun ba Governu tomak no fundu infraestrutura sira.

“Tanba ne’e, la presiza atu hasa’e montante transferénsia Fundu Petrolíferu ba Orsamentu Jerál Estadu,” governante ne’e subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here