Membru Grupu Mobilizasaun Apoiu Umanitária (GMAH, sigla portugés), fahe hela sasán nesesidade bázika ba estudante sira-ne’ebé hela uma aluga (kost). Imajen/Espesiál.

DILI, 24 marsu 2021 (TATOLI)—Inisiadór Grupu Mobilizasaun Apoiu Umanitária (G-MAH, sigla portugés), Alberto Carvalho Araujo, hateten grupu ne’e fó apoiu umanitária ne’e hanesan asaun karidade ida atu tulun estudante sira bele aguenta moris iha situasaun serka sanitária nia laran.

Nia hatutan, bainhira mosu Estadu Emerjénsia (EE) iha marsu tinan kotuk (2020) ne’e, Grupu Mobilizasaun Apoiu Umanitária hahú halo ona asaun karidade hodi fó apoiu umanitária ba maluk kbiit laek sira sira-ne’ebé halerik ba ai-han.

“Iha momentu ida-ne’e, ami-nia grupu hamriik fila-fali halo mobilizasaun, hodi ajuda ita-nia alin sira liliu estudante sira-ne’ebé hela iha uma aluga (kost), osan laiha atu sosa hahan. Tanba, ita hotu mai hosi situasaun pasadu ne’ebé ita sente oinsá situasaun hela iha kost,” Alberto Carvalho Araujo, ba Agência TATOLI liuhosi telefónika, kuarta ne’e.

Nia hateten, apoiu umanitária ne’ebé sira fahe ba estudante sira mai hosi G-MAH, Loza Dili Mart no mós hosi ema laran luak balun ne’ebé mak oferese sasán nesesidade bázia sira-ne’e ba G-MAH mak kanaliza fali ba estudante sira ne’ebé hela no kost uma iha Dili laran.

Nia afirma, Apoiu hosi Loza Dili Mart mak hanesan, foos kilo-lima (5) ne’e hamutuk 200, ikan lata sardina kaixa lima (3), susu bee kaixa lima (3), ervilla ka House lata kaixa lima (5) no Mie Sedaap kaixa 25.

Nia hatutan, maneira fahe sasán nwesesidade bázika ba estudante sira-ne’e, sira fahe bazea ba dadus ne’ebé sira rekolla ona antes, ho totál estudante hamutuk ema nain-480.

“Hosi estudante na’in-480 ita foin fó apoiu ba ema na’in-200, tanba ita fahe apoiu umanitária ne’e foin hahú horiseik. Sasán ne’ebé ami fahe ba estudante sira mak hanesan foos kilo-lima, Mie Sedaap falun haat, susu been lata ida, ervilla ka house lata ida, ita tau hamutuk plastiku mak ema ida hetan plastiku ida,” nia informa.

Tuir nia, sasán hirak ne’e membru G-MAH sira lori sasán hirak ne’e ba estudante sira-nia kost fatin, tanba iha situasuan serka sanitária ne’ebé ema no estudante sira labele halo movimetu ba-mai. 

“Ami mak lori to’o duni sasán sira-ne’e ba estudante sira-nia hela fatin ka kost, maibé ami mós kumpre nafatin regra tuir protokolu saúde nian. Ami la halo kontaktu fíziku no ami mantein nafatin distánsia sosiál, hamriik dook malu bainhira fahe sasá, ba estudante sira,” nia dehan.

Nia haktuir, apoiu umantitária ne’ebé sira oferese ba estudante sira, la haree ba munisípiu ida ka rua ne’ebé afeta ba COVID-19 maibé sira apoiu ba estudante sira hosi munisípiu hotu-hotu inklui Rejiaun Adminisgtrativu Espesiál Oé-Cusse Ambeno (RAEOA).

Jornalista: Arminda Fonseca

Editór: Cancio Ximenes

1 KOMENTÁRIU

  1. Iha né ami mos presiza Itá bot Sira nx tulun.
    Tamba Agora Ami arska atu hetan aí han ba situasaun pandemia covid-19 ne’e.

HAKEREK NO HATÁN

Please enter your comment!
Please enter your name here