Atividade ezersísiu Cobra20-2 F-FDTL. Imajen/Mídia F-FDTL

DILI, 24 marsu 2021 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, afirma, Komandu F-FDTL ho Polísia Nasionál Timor-Leste (PNTL) prontu atua kualkér krime maka ameasa estabilidade nasionál.

Xefe Estadu Maiór Jenerál F-FDTL, Tenente Jenerál Lere Anan Timur. Imajen Tatoli/Antonio Goncalves

Tenente Jenerál Lere Anan Timur, ba jornalista sira, kuarta ne’e, iha Palásiu Prezidensiál, Dili, afirma katak Komandu F-FDTL observa hela konflitu sira ne’ebé akontese iha Dili laran no akompaña hela mensajen sira hosi rede sosiál Facebook ne’ebé lansa hosi ema balun atu halo atake ba malu.

Notísia Relevante : Joven na’in-rua hetan hana no ida taa iha tilun

“Kleur ona la rona problema arte marsiál, maibé iha loron hirak ne’e komesa akontese fila-fali, mezmu iha hela situasaun Estadu emerjénsia no serka sanitaria. Tanba ne’e, PNTL ho F-FDTL sei haree oinsá atu rezolve hodi kontrola joven sira atu preokupa ba sira-nia futuru,” Tenente Jenerál Lere Anan Timur hateten.

Nia apela ba joven sira atu kria paz no estabilidade no kumpre ba regra serka sanitária no konfinamentu obrigatóriu hodi bele kontribui hakotu korrente transmisaun COVID-19 iha Timor-Leste.

Lideransa 77-IKS buka orienta membru sira ba dame-malu

Polísia Nasionál Timor-Leste (PNTL) hosi Unidade Espesial Polísia (UEP) hala’o atraksaun bainhira komemora aniversariu ba dala-XI iha Kuartel UEP, Dili, 14 agostu 2020. Imajen Tatoli/Antonio Goncalves

Komandu Polísia Nasionál Timor-Leste (PNTL) Munisípiu Dili sei koordena ho Prezidente Komisaun Reguladór Arte Marsiál (KRAM) hodi konvida lideransa organizasaun arte rituál Sete-Sete (77) no Ikatan Keluarga Silat (IKS)-Kera Sakti atu halo apelu konjunta hodi orienta membru sira ba dame -malu no kontribui ba estabilidade.

Segundu Komandante PNTL Munisípu Dili, Superintendente Euclides Belo, informa sira-nia parte orienta ona membru Ofisiál Polísia Suku (OPS) no koordena ho Prezidente KRAM, Octavio da Conceição, atu konvida lideransa sira hosi 77 ho IKS Kera Sakti atu tuur hamutuk buka solusaun pasiva no imediata ba konflitu ne’ebé envolve membru hosi organizasaun rua ne’e.

Segundu Komandante PNTL Munisípiu Dili, Superintendente Euclides Belo. Imajen Tatoli/Eugénio Pereira

“Lideransa 77 ho IKS Kera Sakti sei halo apelu ida ba membru tomak atu labele kria problema no ameasa malu, tanba lei bandu,” Euclides Belo informa ba jornalista iha Komandu PNTL, Caicoli, Dili.

Parte PNTL mós rekolla ona informasaun husi grupu juventude arte rituál 77 nian balun iha área Fatuhada no fatin balun ne’ebé halo rituál hodi fó sai iha rede sosiál Facebook atu halo ataka malu ho grupu IKS Kera Sakti iha kapitál Dili.

“Labele halo tan vídeo hodi provoka situasaun no hata’uk ita-nia komunidade, ita tenke kontribui ba estabilidade, tanba se ita ameasa malu, ita la kontribui ba dame,” Euclides Belo tenik.

PNTL apela mós ba komunidade kapitál Dili atu tuur hakmatek iha idak-idak nia uma hodi prevene aan hosi peste letál COVID-19 no labele sai vítima ba kazu krime.

Tuir informasaun ne’ebé Agência Tatoli simu hosi parte Sekretáriu Estadu Juventude no Desportu (SEJD) liuhosi KRAM, sesta (26/03), tuku 10:00 Otl, sei halo reuniaun entre responsavel IKS Kera Sakti ho  77 hato’o mensajen konjunta  ba membru sira atu labele kria problema  ka organiza malu halo krime iha Dili laran.

Jornalista   : Nelson de Sousa/ Eugénio Pereira

Editór        : Francisco Simões

 

 

HAKEREK NO HATÁN

Please enter your comment!
Please enter your name here