Ilustrasaun COVID-19. Imajen/Espesiál

DILI, 24 marsu 2021 (TATOLI)-Konsellu Ministru (KM) rona aprezentasaun hosi ekipa Sala Situasaun, Sentru Integradu Jestaun Krize (CIGC, sigla portugés) no analiza pontu situasaun epidemiolójika iha Timor-Leste.

“Responsável sira Sala Situasaun CIGC aprezenta prioridade imediata hodi foku ba transmisaun COVID-19 ne’ebé eziste, liuhosi detensaun lais no izolamentu ba kazu pozitivu hotu,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha salaun Ministériu Finansa (MF), Aitarak-laran, kuarta ne’e.

Tuir Portavós Governu, iha posibilidade aumenta kapasidade análize laboratoriál no rastreiu kontaktu besik kazu ativu  sira.

“Ida-ne’e hanesan prioritáriu hodi prevene transmisaun vírus ba munisípiu sira seluk no prepara asaun mitigasaun ne’ebé presiza ba posível foku transmisaun komunitária ne’ebé bele iha,” nia akresenta.

Objetivu prioritáriu seluk maka halo mitigasaun kona-ba efeitu sosiu ekonómiku liga ho COVID-19.

Daudaun ne’e, rejista kazu esporádiku iha Rejiaun Administrativa Espesiál Oé-cusse Ambeno (RAEOA) no Covalima, propagasaun kazu iha Baucau, Viqueque no Lautém, ne’ebé ho orijen hosi ema sira ne’ebé mai hosi Dili, molok impozisaun serka sanitária no halo propagasaun COVID-19 maka’as liután iha área oin-oin iha sidade Dili.

To’o oras ne’e, kazu pozitivu COVID-19 ne’ebé rejista ona iha Timor-Leste desde marsu 2020 hamutuk 372, rekuperadu 129, no kazu ativu ne’ebé baixa hela iha sala izolamentu hamutuk 247.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here