Planu Lejislativa 2021.Imajen/Portal Governu

DILI, 23 marsu 2021 (TATOLI)—VIII Governu Konstitusionál liuhosi Prezidénsia Konsellu Ministru, halo kompilasaun planu lejislativu ho baze proposta sira ne’ebé membru Govenu submete no previzaun intervensaun lejislativa ne’ebé hanesan prioridade iha tinan 2021, tanba konsidera planu lejislativu hanesan instrumentu atu hadi’a kualidade atividade lejislativa Governu.

Iha tinan ne’e, Governu sei halo apresiasaun no aprovasaun ba intervensaun lejislativa 241 iha Konsellu Ministru, ne’ebé kompostu hosi Proposta-Lei 47, Dekretu-Lei 172 no Dekretu Governu  22.

“Intervensaun lejislativa fahe ba setór prioritáriu ne’ebé define ona iha programa Governu hanesan dezenvolvimentu kapitál sosiál, dezenvolvimentu infraestrutura, dezenvolvimentu ekonomia, konsolidasaun governativa no boa governasaun kombate korrupsaun,” refere nota ezekutiva ne’ebé Agência TATOLI asesu iha tersa ne’e.

Planu hirak ne’e publika ona iha loron 22 marsu no sei entrega ba Parlamentu Nasionál iha tempu badak.

Iha dezenvolvimentu kapitál, Governu prevee aprova intervensaun lejislativa 57, iha setór infraestrutura 19, área ekonomia iha intervensaun lejislativa 39, nível konsolidasaun governativa sei iha inisiativa lei 24 no iha setór boa governasaun no kombate korrupsaun sei iha dispozisaun lejislativa 102 ne’ebé sei aprova.

Iha edukasaun no formasaun, hanesan área ne’ebé Governu reitera iha programa hanesan ‘direitu fundamentál sidadaun’ no dezenvolvimentu sosiál no ekonómiku, ne’ebé iha planu sei iha Proposta-Lei krisaun Lei Baze Ensinu Superiór no Dekretu-Lei ba kriasaun Rejime Jurídiku Administrasaun no Jestaun Sistema Edukasaun Pré-Eskolar inklui alterasaun Rejime Jurídiku Administrasaun no Jestaun Sistema Ensinu Báziku no Ensinu Sekundáriu.

Sei iha mós alterasaun ba programa ‘Merenda Eskolár’ no kriasaun programa Bolsa Estudu ba Ensinu Superór ne’ebé hala’o hela iha territóriu nasionál no alterasaun Rejime Atribuisaun Bolsa Estudu ba rai-li’ur.

Intervensaun lejislativa iha setór saúde, sei kria Lei prevensaun kontrolu moras da’et no revizaun Lei kona-ba Sistema Saúde, ho objetivu atu garante hadi’a prestasaun servisu setór saúde, hanesan jeneraliza asesu ba kuidadu saúde ne’ebé ho kualidade.

Iha área Inkluzaun Sosiál, Protesaun Sosiál no Solidaridade, Governu hakarak inisia lejislativa ba kriasaun pensaun mínima, Lei Baze Protesaun Sosiál no Lei Protesaun Labarik, iha mós altesaun ba Rejime Jurídiku Subsídiu Apoiu ba Idozu no Inválidu sira inklui Rejime Subsídiu Apoiu Kondisionál hanesan ‘Bolsa da Mãe’.

Iha dezenvolvimentu kapitál sosiál, iha tinan ne’e Governu hakarak kria Identifikadór Úniku ba sidadaun, ne’ebé hanesan regulár edifikasaun urbana no kria lei kona-ba privasidade no protesaun dadus pesoál, seguransa sibernétika, troka dadus transasaun eletrónika no kriminalidade informátika.

Iha infraestrutura, define hanesan ‘krusiál dezenvolvimentu ba ekonómiku no sosiál’, ne’ebé permite sustenta produtividade, kriasaun empregu, no dezenvolvimentu setór privadu iha nível nasionál tanba Governu hakarak halo intervensaun iha regulamentu rede rodoviária nasionál, jestaun rekursu ídriku, enerjia renovável no asesu rota rede internasionál, inklui sei kria Rejime Jurídiku ba Lisensiamentu Rede Telekomunikasaun Externa.

Aumenta produtividade nasionál no kria oportunidade kreximentu ekonómiku sustentável

Ba dezenvolvimentu ekonomia, iha intervensaun lejislativa oin-oin atu aumenta produtividade nasionál no kria oportunidade ba kreximentu ekonómiku sustentável.

Governu mós sei kria Empreza Mineira ida no Fundu Mineiru no instala jestaun parke industriál ne’ebé hanesan alvu ba regulamentasaun iha 2021.

Iha empregu, sei halo regulamentu ba traballu doméstiku, seguransa, saúde, ijiene traballu, no saláriu mínimu empregu iha indústria extrativa.

Aleinde ne’e, Lei Traballu sei sai alvu atu halo revizaun iha tinan ne’e no sei kria Sentru Nasionál Exelénsia ba Formasaun Kualifikada.

Governu mós sei halo intervensaun ba regulamentu kooperativa kréditu, agíkola, komersiál, no multi-setorál no iha setór ambientál sei kria Ajénsia Nasionál Lisensiamentu Ambientál no regulamentu foun atu fó resposta ba alterasaun klimátika ba kontrolu poluisaun inklui edukasaun no formasaun ambientál.

Iha nível konsolidasaun governativa, Governu planeia ona intervensaun lejislativa atu promove dezenvolvimentu indústria finanseira no hadi’a no fortalese jestaun finansa públika ho transparénsia, responsabilidade, efisiénsia no sustentabilidade inklui sei halo intervensaun iha reforma tributária no jestaun finansa públika.

Iha medida boa governasaun no setór públiku profisionál, kompetente no efisiente hanesan kondisaun esensiál ba prestasaun servisu públiku no implementasaun polítika no intervensaun ne’ebé haktuir ona iha Planu Estratéjiku Dezenvolvimentu no Programa Governu.

“Setór ne’e sei iha intervensaun barak iha tinan 2021, iha programa Governu hakarak aumenta konfiansa ba governasaun, implika dezempeñu elevada ba setór públiku tanba konsidera hanesan motór preinsipál ba kreximentu ekonómiku.

Governu sei halo revizaun ba kriasaun Komisaun Funsaun Públika no alterasaun ba estatutu ba rejime konkursu, rekrutamentu, selesaun no promosaun pesoál ba administrasaun públika, rejme avaliasaun dezenpeñu traballadór administrasaun públikano rejime kargu diresaun no xefia administrasaun públika.

Iha mós alterasaun konjuntu relasiona ho administrasaun eleitorál inklui iha ámbitu desentralizasaun no ordenamentu territóriu.

Nune’e mós iha justisa, Governu sei aprova kódigu rejistu prediál, rejime jurídiku zona protesaun komunitária no bens imóvel komunitáriu, kódiku rejistu sivíl, rejime jerál kontraordenasaun no alterasaun lei nasionalidade, inklui ba Kódigu Penál no Lei Protesaun Testamuña.

Enkuantu, iha Defeza no Seguransa, sei iha alterasaun estatutu, regulamentu no rejime remuneratóriu Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).

Iha mós alterasaun Lei Imigrasaun no Azilu, ne’ebé sei krianúmeru úniku ba emerjénsia.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here