Koordenadór Forsa-Tarefa ba Prevensaun no Mitigasaun surtu COVID-19 iha Timor-Leste, hosi Sala Situasaun SIJK, Rui Maria de Araújo. Imajen Tatoli/Egas Cristóvão.

DILI, 23 marsu 2021 (TATOLI)—Sala Situação Centro Integrado Gestão de Crise (SS-CIGC), simu ona pedidu hamutuk 1.000, hosi Timoroan-sira ne’ebé hakarak sai hosi Dili ba Munisípiu, maibé pedidu hirak ne’e la prienxe kritéria lima, ne’ebé hatuur ona iha rezolusaun Governu.

Koordenadór Forsa-Tarefa ba Prevensaun no Mitigasaun, Rui Maria de Araújo, fó-sai asuntu ne’e, liu hosi konferénsia imprensa iha Centro Convenções Dili (CCD), tersa ne’e.

Notísia relevante:Hakarak tama-sai munisípiu ne’ebé iha SS tenke husu ba ‘Aluk’

“Pedidu rihun ida ne’e la prienxe kritéria. Katak, ema bele husu autorizasaun esesionál atu sai hosi Munisípiu Dili iha serka sanitária bainhira prienxe razaun lima,’’ Rui Maria de Araújo informa.

Entretantu, kritéria lima ne’ebé hatuur iha rezolusaun númeru 15/2021, 15 marsu, Governu mantein impozisaun serka sanitária iha Munisípiu Díli maka, dahuluk, kona-bá seguransa públika, signifika,  ema ne’ebé mai hosi instituisaun FALINTIL Forsa Defeza Timor-Leste (FFDTL), no Polísia Nasionál Timor-Leste (PNTL), mak bele halo dezlokasaun ba-mai.

Daruak, saúde públika, signifika ema ne’ebé hala’o serbisu iha área saúde mak prienxe kritéria.

Datoluk, maka asisténsia umanitária, signifika ema sira ne’ebé dezloka sai atu fó asisténsia umanitária ba ema seluk.

Dahaat, maka manutensaun, signifika ema ne’ebé halo manutensaun ba Eletrisidade Timor-Leste (EDTL)  no rede bee ka estrada mak bele sirkula no dalima maka, sira ne’ebé serbisu ba interese públiku.

Antes ne’e,  SS-CIGC fó-sai katak, kualkér sidadaun ne’ebé hakarak atu tama ka sai hosi munisíupiu-sira ne’ebé Governu impoin ona Serka Sanitária (SS), tenke halo pedidu no dirije ba Diretór SS-CIGC, Brigadeiru Jenerál João Miranda ‘Aluk’.

Pedidu ne’e tenke diriji hotu ba Brigadeiru Jenerál João Miranda ‘Aluk’, liu hosi email centrointegradogestaodecrises@gmail.com. Bele mós haruka WhatsApp ba 77575151 ka 74236509, bele mós telefona ba 77539773 hodi halo follow up.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here