Xefe Suku Home, Postu Administrativu Lospalos, Munisípiu Lautém, Luis dos Santos "Maubano". Imajen/Espesiál.

DILI, 23 marsu 2021 (TATOLI)—Xefe Suku Home, Postu Administrativu Lospalos, Munisípiu Lautém, Luis dos Santos “Maubano”, informa Administradór Munisípiu Lautém foti kedas medida preventiva hodi deside hala’o izolamentu provizóriu ba populasaun sira iha Suku Home atu kumpre, tanba kazu pozitivu COVID-19 ne’ebé ekipa saúde identifika ne’e hela iha suku ne’e.

Notísia Relevante: COVID-19: Autoridade no Polísia Lautém deside izola provizóriu suku Home

Nia hatutan, objetivu izolamentu provizóriu ne’e oinsá atu fó tempu ba pesóal saúde sira hahú ohin ba leten, halo teste swab ba komunidade hosi Suku Home tomak liuliu Aldeia Lilapuhu tanba ema ne’ebé afeta pozitivu COVID-19 ne’e hela no hosi aldeia refere.

“Horisehik kedas ami tama ba situasaun prevensaun nian ka izolamentu provizóriu. Tanba Suku Home ne’e iha ninia aldeia haat, agora aldeia ida naran Lilapuhu ne’e mak afeta ona ba Kazu pozitivu COVID-19 nian, entaun autoridade munisipál aplika kedas izolamentu provizóriu. Nune’e, hahú ohin parte saúde foti ona amostra hosi komunidade Lilapuhu no inklui mós aldeia seluk iha Suku Home ne’e,” Xefe Suku Luis dos Santos “Maubano” informa ba Agência TATOLI liuhosi telefónika, tersa ne’e.

Tuir nia, izolamentu provizóriu ne’ebé daudaun ne’e aplika iha Suku Home la’ós permanente maibé fó tempu de’it ba pesoál saúde sira hala’o sira-nia atividade foti amostra hotu, hein rezultadu negativu mak atividade sei la’o normál fila-fali.

Kronolojia akontese kazu pozitivu COVID-19 iha Suku Home ne’e, nia dehan, tanba Suku Home nia oan sira-ne’ebé hala’o estudu iha Kapital Dili, sira-nia família mate iha Suku Home, Aldeia Lilaphu, entaun sira husu autorizasaun responsável COVID-19 nian iha Dili halo viajen mai Lospalos, agora to’o mai iha ne’e mak hafoin deteta katak nia pozitivu ba COVID-19.

Entaun, nia hateten, haree ba situasaun ida-ne’e mak daudaun ne’e atividade no movimentu ema no transporte públiku atu tama-sai iha Suku Home ne’e paradu hotu. Populasaun ida-idak hakmatek iha sira ida-idak nia uma, hodi hein de’it orientasaun hosi parte saúde nian.

Ita fó tempu ba pesoál saúde hala’o sira-nia servisu tanba pozitivu na’in-ida ona. Posibildade bele iha ona transmisaun lokál. Maibé, ita hein de’it bainhira mak pesoál saúde sira foti hotu ona amostra mak nia rezultadu halo nusá ne’e, ita hein de’it,” nia hateten.

Tanba ne’e, nia apela ba komunidade Suku Home tomak atu uza nafatin iha konsiénsia hodi la’o tuir orientasaun hosi protokolu saúde nian hodi kumpre medida prevensaun uza máskara bainhira la’o sai ko’alia ho ema ruma, fase liman ho sabaun bainhira atu han ka hemu, no distánsia sosiál metro ida ka metru ida ho balun bainhira halibur malu iha fatin ida.

Nia infroma, Suku Home iha aldeia haat mak hanesan Aldeia Lilapuhu, Larinatcha, Reisoru no Tchenuloru ho totál populasaun hamutuk 3203.

Jornalista: Arminda Fonseca 

Editór: Cancio Ximenes

HAKEREK NO HATÁN

Please enter your comment!
Please enter your name here