Foos ne’ebé rai iha CLN iha 2020, MSSI distribui ba estudante kost iha Dili. Imajen Tatoli/Egas Cristóvão.

LIQUIÇA, 23 marsu 2021 (TATOLI) – Diretór Interinu Ministériu Solidariedade Sosiál no Inkluzaun (MSSI) Munisípiu Liquiça, Dionísio de Jesus da Costa, hateten sira-nia parte oferese ona foos ba estudante balun iha Instituto São João de Brito (ISJB) Liquiça ne’ebé hela iha kost.

“Ami hetan kontaktu hosi nasionál katak iha Liquiça iha eskola Instituto São João de Brito ne’ebé lokaliza iha Suku Ulmera, iha ne’ebá iha estudante barak mak hela iha kost,” Dionísio de Jesus da Costa, informa ba Agência Tatoli iha Liquiça, tersa ne’e.

Estudante hirak ne’e, tuir dadus hosi MSSI Liquiça katak balun mai hosi munisípiu sira hanesan Baucau, Viqueque, Lautem, Manufahi, Oe-Cusse no Dili.  Tanba ne’e, iha tempu serka sanitáriu ne’e, sira labele fila ba sira-nia munisípiu entaun MSSI ajuda foos ba sira.

Nia dehan, antes ajuda foos ba estudante hirak ne’e, sira-nia parte tun direita iha terrenu no kontaktu ho padre sira iha eskola refere no  loos duni iha estudante lubuk ida ne’ebé hela iha kost no labele fila ba ida-idak nia munisípiu.

“Ami ba identifika estudante hamutuk na’in-45, entaun ami konsege distribui kedan foos saku 12. Ami entrega mak foos de’it buat seluk laiha ona,” nia hateten.

MSSI Liquiça fó mós foos ba estudante balun iha  Suku Lauhata no estudante balun estájiu iha Rádiu Tokodede Liquiça tanba estudante hirak ne’e tuir formasaun iha Dili no estájiu iha Liquiça.

Nia informa odamatan MSSI Liquiça nakloke nafatin ba povu kbiit-laek sira ne’ebé susar atu hetan ai-han iha tempu estadu emerjénsia  bele hato’o pedidu ba Xefe Suku sira hodi submete ba MSSI Munisípiu hodi fó tulun.

“Iha semana hira liu-ba ita mós fó ona foos hamutuk saku 10 ba madre no orfanatu sira iha Loes tanba sira mós presiza tebes entaun ami ajuda no ajuda orfanatu Maubara,” nia relata.

Antes ne’e, pedidu hato’o hosi MSSI Munisípiu ba MSSI Nasionál no haruka ona foos kilo 25 hamutuk saku 800 ba armazén Liquiça hodi responde ba nesesidade urjente komunidade nian.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here