Koordenadór Médiku Sentru Saúde Postu Administrativu Remexio, Munisípiu Aileu, Marcelina Soares Quintão. Imajen/Espesiál.

DILI, 23 marsu 2021 (TATOLI)—Koordenadór Médiku Sentru Saúde Postu Administrativu Remexio, Munisípiu Aileu, Marcelina Soares Quintão, informa hosi fulan jeneiru no favereiru tinan ne’e, moras ne’ebé rejistu aas iha Sentru Saúde Remexio mak infesaun vias respiratóriu aguda.

“Durante fulan janeiru-fevereiru 2021, ita rekolla dadus hahú hosi Sentru saúde Remexio to’o ba Postu saúde haat no Postu Tratamentu Saúde tolu ne’e, rejistu moras aas liu mak infesaun vias respitatóriu aguda na’in-1.377, diareia na’in- 349, disentri na’in-19, no moras seluk hamutuk na’in-2.334,” Marcelina Soares Quintão informa ba Agência TATOLI liuhosi telefónika, tersa ne’e.

Kauza hosi moras infesaun vias respiratóriu ne’e, nia dehan, afeta hosi ahi-su’ar tanba komunidade barak mak tein uza ai-sunu, sigaru nia su’ar, rai-rahun su’ar, no ijiene pesoál.

“Tanba ita haree kauza loloos hosi infesaun vias respiratóriu (ispa) ne’e la’ós ida de’it maibé ita bolu multi fatoriál tanba ita-nia hela fatin ne’ebé ladún adekuadu no dala ruma konsumu bee matak hosi bee-matan, entaun bele hamosu moras hirak ne’e,”  nia dehan.

Nia haktuir, pasiente sira-ne’ebé afeta ba moras infesaun vias respiratóriu aguda ne’e hahú hosi idade zero to’o idozu sira.

“Daudaun ne’e ita rejistu dominante liu makkatuas no ferik sira ho idade 59 ba leten. Maibé, pasiente sira-ne’e ita halo atendimentu ne’ebé di’ak entaun sira-nia kondisaun rekoperadu hotu ona,” nia hateten.

Polítika alternativu ne’ebé sira halo atu prevene moras sira-ne’e, nia dehan, halo sensibilizasaun no promosaun saúde nian ba estudante sira iha eskola no komunidade sira hotu iha Postu Administrativu Remexio.

“Ita rekomenda ba sira hotu-hotu tenke moris iha ijiene nia laran katak fase liman ho sabaun, tanba ida ne’e mak dalan di’ak atu prevene moras saida de’it. Nune’e mós, ita mensiona nutrisaun di’ak ba labarik oan sira,” nia dehan.

Nia informa, Sentru Saúde Postu Administrativu Remexio iha ninia Postu Saúde haat (4) no Postu Tratamentu (tolu) mak hanesan Postu Saúde Fada-Bloco, Maumeta, Faturasa, Tulataqueo no Postu Tratamentu Hautoho, Bereliurai no Postu Tratamentu Sucu Liurai, hodi atende totál populasaun hamutuk na’in-12.625.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here