Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen TATOLI/Egas Cristóvão

DILI, 23 marsu 2021 (TATOLI)—Ministériu Negósiu Estrajeiru no Kooperasaun (MNEK) kontinua buka dalan hodi repatria bolseiru médiku espesialista timor-oan iha Cuba, ne’ebé termina ona sira-nia estudu.

“Ami sei kordena Ministeriu Ensinu Superiór hodi bele haree, tanba sira-nia eskola hotu ona,” Ministra Adaljiza dehan iha Aeroportu Internasionál Prezidente Nicolau Lobato, Comoro, Dili, tersa ne’e.

Tuir governante ne’e, loloos bolseiru sira fila ona, maibé  iha kestaun balun maka halo sira la konsege fila.

“Iha fallansu tékniku balun, maibé ami esforsu nafatin atu buka solusaun, nune’e bele rezolve sira-nia problema no bele fila lalais,” nia akresenta.

Notísia relevante: Bolseiru médiku espesialista Timoroan iha Cuba lamenta esklui viajen voo dala-rua

Tuir nia, bolseiru sira iha Cuba ho kondisaun di’ak tanba daudaun sira iha osan liu hosi bolsa estudu ne’ebé hetan, hodi uza sustenta nesesidade loron-loron.

Bolseiru hirak ne’e hamutuk na’in-23, ne’ebé hala’o estudu iha espesialidade no hosi númeru ne’e, iha na’in-17 finaliza ona estudu dezde dezembru 2020 no na’in-15 mak simu ona diploma no hein atu fila.

Bolseiru na’in-15, kompostu hosi espesialista kardiolojía na’in-tolu, terapia intensiva na’in-haat, nefrolojía na’in-tolu, neurolojía na’in-ida, endokrinolojía na’in-rua no imajenolojía na’in-rua.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here