Renato da Costa

Hosi:

Renato da Costa

Ohin loron, movimentu informasaun konaba pandemia COVID19 ne’ebé alastra iha mundu tomak hamosu konsekuénsia boot konaba oinsá ita atu jere informasaun ho di’ak hodi kuntinua fónafatin esperansa ba públiku.

Sirkulasaun informasaun entre falsa no verdade konaba pandemia ne’e ho narativa médika nian transforma tiha ona sai narativa sosiál no polítika ne’ebé destrói rasionalidade ema nian entre fiar ou lae ho kondisaun atuál.

Iha sorin seluk, esforsu governu hodi kombate surtu ne’e hamosu situasaun inserteza, tanba de’it mudansa informasaun ne’ebé enquadra ho nia sofistikasaun komunikasaun via rede sosiál no mídia sira, tantu eletronika no imprimi.

Grave liutan, bainhira iha parte balun hamosu informasaun tendensioza ho ninia senáriu hodi hamosu frakazu husi estratéjia Governu hodi enfrenta pandemia ne’e ho informasaun falsa. Ikus mai, dinámika komunikasaun ne’ebé durante ne’e ita utiliza iha situasaun pandemia COVID-19, revela ita hotu nia seriedade konaba modelu komunikasaun saida mak di’ak atu ita utiliza ho nia estratéjia tomak.

Artigu ne’e koloka asuntu relevante konaba embalajen husi mensajen ne’ebé hato’o husi governu hamosu dinámika foun entre informasaun sira pozitiva no negativa ne’ebé afeta tebes aspetu hotu iha vida ema nian.

Ida ne’e, sai ita hotu nian preokupasaun, oinsá pandemia COVID-19 kria ona situasuan frajil ba Timor Leste durante períodu tinan ida nia laran, liu liu konaba medida ne’ebé mais rigór hodi hasoru situasaun ne’e ho informasaun ne’ebé klara no onestu ba ninia povu rasik.

Ita hotu hatene desde pandemia COVID-19 ataka Timor-Leste iha marsu 2020 ho ninia resureisaun iha fevereiru 2021 iha kapitál Dili, hamosu tebes kauza boot iha sosiadade nia leet. Setór ekonomia paradu, tanba restrisaun sosiál. Atividade sosiál, kulturál, relijioza, edukasaun to’o mais rutina tenke interompe.

Buat sira ne’e hotu, tanba de’it implikasaun husi pandemia COVID-19 ne’ebé akontese iha nasaun seluk to’o ema barak mak tenke lakon nia vida. Ba ita iha Timor-Leste, sei hetan KARTAUN SORTE.

Até ohin loron Timor-Leste seidauk rejista kazu mate husi pandemia ne’e. Maibé, serake ita tenke kontinua hakilar ho ita nia hipokrisia konaba informasaun falsa husi pandemia ne’e, ou ita tenke hamrik hamutuk hodi luta kontra lia falsa ne’e? Saida mak ita nia nai ulun sira tenke atua perante informasaun hodi bele hamosu konfiansa husi parte hotu hodi hasoru inimigu invizível ne’e?.

Pandemia nee husik hela lisaun boot ba ema hotu iha mundu. Situasaun ne’e obriga país hotu aplika medida mais rigór liuhusi jestaun moris no vida foun ho kondisaun ida atu oinsá moris ho dame tanba pandemia Coronavírus ne’e.

Liuhusi medida ne’e, públiku bele kontinua nafatin sira nia atividade hanesan bain bain hodi kumpre nafatin protokolu saúde ne’ebé mak anúnsia husi Organizasaun Mundiál ba Saúde no Estadu. Bainhira públiku konformidade ho regra ne’ebé mak iha, redusaun númeru ema pozitivu bele redus ho neneik.

Hotu hotu hatene katak públiku ein jerál iha inisiu tinan 2020 mosu tiha ona alerta konaba posibilidade vírus COVID-19 tama Timor-Leste. Situasaun ne’e hamosu tebes preokupasaun tanba temperatura situasaun polítika interna altura ne’eba la estável. Entre mantein elejibilidade polítika ou tenke luta hamutuk hodi kontra pandemia ne’e?

Finalmente iha loron 21 marsu 2020, Timor-Leste deklara nu’udar país ne’ebe mak infektadu ona husi vírus COVID-19, liu de’it loron hira, governu emiti apelu konaba Estadu emerjénsia ba dahuluk nian hodi husu públiku ein jeral obedese ba desizaun hirak ne’e. Maibé depois liu tinan ida, mosu kestaun barak iha domíniu públiku. Tanbasa virus ne’e bele espalla iha fatin fatin?. Afinál ita moris iha ámbitu Estadu emerjénsia nia laran.

Serake medida restrisaun konaba aplikasaun Estadu emerjénsia mak ladun forte ou intensaun por razaun sira polítika mak hafalun hela desizaun Estadu emerjénsia nee?. Serake ne’e aktu konspirasaun balun?. Serake públiku hetan ona informasaub mais reál konaba ezisténsia COVID-19 ?. Tanbasa mak sei iha ema balun kestiona nafatin ezisténsia husi virus ne’e? Oinsá konaba Governu ninia resposta ne’ebé verdadeira hodi konvense ninia povu?.

Verdade duni ou lae informasaun ne’ebé governu transmiti to’o duni iha komunidade nia leet, liu liu sira ne’ebé mak sei duvida konaba virus nee?. Tanbasa mak liuhusi rede sosiál no mídia sira, ema balun kontinua kestiona konaba ezisténsia COVID-19 iha Timor-Leste hodi espalla HOAX?. Resposta ba perguntas hirak ne’e mak “PRESIZA KAMADA SOSIÁL HOTU NIA INVOLVIMENTU ATIVA IHA PROSESU NEE ”.
Oinsá bele partisipa ativa ho senáriu komunikasaun nian?

Iha faze inisiu kedas krítika konaba lina koordenasaun governu nian konaba falta sensu ba krize (Sense of Crisis) entre instituisaun Estadu sira konaba COVID-19 hamosu ona públiku nia duvida. Maske iha esforsu lubun ho nia tentativa balun hodi mellora serbisu hirak ne’e. Mas iha sorin seluk públiku kontinua kestiona dezempenu governu nian konaba implementasaun ho ninia jestaun konaba luta hasoru COVID-19.

Iha situasaun ida ne’e, boa jestaun konaba komunikasaun públika nesesária tebes iha situasaun hirak ne’e. Tanba ansiedade no pániku inevitavelmente konaba mudansa informasaun difísil tebes atu kontrola. Ho efeitu ida katak falta asaun rapida hodi transmiti polítika governamentál ba públiku iha situasaun krize sei hamosu públiku nia duvida. No ida ne’e sei fo opurtunidade bo’ot tebes ba ema seluk hodi espalla HOAX nu’udar informasaun verdadeira.

Iha estudu komunikasuan ko’alia konaba tipu komunikasaun ne’ebé mais simplis, liu liu haree ba totál populasaun Timor-Leste ne’ebé fasil atu ita jere maske moris iha ámbitu polítika ne’ebé diferente.

Modelu TOP DOWN (husi leten tun mai kraik) no modelu BOTTOM UP (husi kraik sae ba leten) sai nu’udar modelu ne’ebé mais simplis kuandu haree ba omojenidade povu Timor ne’ebé kuaze moris ho relijiaun ne’ebé hanesan ho eterojenidade simplis tanba kestaun lingua materna no kultura balun.

Diverjénsia simplis ida hanesan ne’e, nesesita tebes hamosu plataforma komunikasuan ne’ebé uniforma ho modelu komunikasaun ne’ebé sita ona. Ho hanoin ida katak mudansa komportamentu kada ema no grupu sosiál mais fasil bainhira individu sira ne’e hola parte husi prosesu hotu.

Jestaun ne’e aplika hodi hamosu sentimentu nu’udar nain hodi fó mos intervensaun importante balun husi desizaun hirak ne’e. Ho nune’e bainhira modelu komunikasaun ne’e ita opta, desizaun sira ne’ebé impoen ninia sidadaun hodi banati tuir sei realiza ho susesu.

Iha senáriu aplikasaun konaba tipu komunikasaun TOP DOWN, uluk nanain rekonese uluk lai populasaun ne’ebé mak sai objetu husi planu ne’e.

Iha kontestu ne’e liu liu konaba medida luta kontra COVID-19 ne’ebé ninia alvu mak povu Timor-Leste, aprosimasaun ba irarkia ne’ebé ezisti iha sosiadade nia leet presiza involve hotu. Bainhira informa ba sira polítika husi desizaun hirak ne’e ho informasaun ne’ebé klara hodi lahamosu duvida iha sira nia leet, ita hametin ona sosiadade ninia fiar ba polítika ne’ebé ita opta. Ho hanoin ida katak, sosiadade ou grupu sira ne’e mak hanesan igreja, sosiadade sivíl, lider partidu polítiku, autoridade lokál sira, akademiku, grupu asosiasaun sira, lia nain inklui lideransa grupu feto, juventude no difisiente sira.

Mensajen hirak ne’ebé transforma ba sira tenke mai ho tipu mensajen uniforma. Hodi nune’e bainhira grupu hirak ne’e kontinua transmite mensajen sira ne’e ba parte esternál, uniformizasaun informasaun konaba medida hotu bele kapta iha ne’eba.

Bainhira mensajen ne’ebé hato’o ona iha nivel TOP DOWN ba kamada sosiadade sira ne’ebé ezisti, entidade hirak ne’e mak sei kontinua transmite mensajen ho tipu BOTTOM UP liuhusi diálogu ne’ebé aberta no demokrátiku hodi rekonese no rona mos sidadaun ne’e ninia preokupasaun nu’udar sujeitu ativu.

Iha parte seluk, sidadaun iha nivel kraik husi grupu ne’ebé hanesan, sente konfortavel hodi hato’o sira nia lamentasaun ba sira nia lideransa husi buat ne’ebé sira sente afeta tebes sira nia atividade lor loron. Siklu hodi rona husi kraik no lori mai nivel altu hodi foti desizaun sei hamosu kunfiansa públiku konaba medida hirak ne’ebé atu foti ba intereses públiku nian.

Tanba desizaun hotu bazeia ba faktu ne’ebé mak ninia sidadaun enfrenta iha terenu, luta kontra COVID-19 aplika ho modelu universál no uniformiza. Iha ne’e kedas , informasaun HOAX sei lakon husi sosiadade nia leet, tanba sosiadade konsumu informasaun husi fonte ne’ebé iha kredibilidade reprezenta lider kamada sosiedade sira.

Ikus liu konsidera mos karakterístika husi senáriu komunikasaun TOP DOWN no BOTTOM UP ninia pontu atensaun mak opta prinsipiu iha involvimentu parte hotu konaba planeamentu, implementasaun to’o halo avaliasaun husi desizaun sira ne’e hotu’ ne’ebé ninia orientasaun ba ninia emar sira.

Ho senáriu simplis ne’e, ita sei ajuda públiku hodi hetan informasaun ho di’ak ho forma hanesan hodi evita rumor ne’ebé espalla husi ema irresponsavel sira tanba involvimentu kamada boot ba interese nasionál nian akomoda hotu ona iha ne’eba.

Dala wain ona, fragmentasaun informasaun konaba COVID-19 ne’ebé laiha filtrajen mosu iha públiku nia leet rezulta husi má-entendimentu hodi unifika perspetiva públiku nian ne’ebé kontinua tranzmite husi mídia sira.

Situasaun hirak ne’e desfavorável tebes ba nível konfiansa públiku nian ba governu. Nível konfiansa públiku importante tebes iha kamada sosiadade nia leet hodi prepara sira nia an enfrenta pandemia ne’e. Iha sorin seluk, ita hotu tenke rekonese katak, problema konaba informasaun HOAX ou informasaun falsa sira ne’e mosu tiha ona antes pandemia.

Hakerek nain nu’udar observadór mídia no komunikasaun sosiál.

HAKEREK NO HATÁN

Please enter your comment!
Please enter your name here