Aviaun Hercules Nova Zelandia neebe tula ekipamentus protesaun Covid 19 bainhira too iha aeroportu Internasional Prezidente Nicolao Lobato Dili, Tersa 23 Marsu 2021.Imajen Tatoli/Antonio Goncalves

DILI, 23 marsu 2021 (TATOLI)—Aviaun KIWI 328 tipu Herkules C-130 (Royal New Zelandia Air Force NPH816) hosi Nova Zelándia tula ekipamentu protesaun COVID-19, to’o iha Aeroportu Internasionál Prezidente Nicolau Lobato, Comoro, Dili, iha tuku 09:52.

Materiál protesaun hirak ne’e simu direta hosi Ministra Negósiu Estrajeiru no Kooperasaun (MNEK), Adaljiza Albertina Xavier Reis Magno, ekipa hosi Embaixada Nova Zelándia iha Timor-Leste, reprezentante hosi Ministériu Saúde no Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins no ekipa.

Ekipamentu protesaun COVID-19 ne’ebé tula hosi Aviaun Herkules Nova Zelándia to’o iha Aeroportu Comoro, tersa (23/03). Imajen TATOLI/António Gonçalves

Iha intervesaun, Ministra Adaljiza hateten materiál hirak ne’e hanesan doasaun hosi Governu Nova Zelándia ba Timor-Leste, tanba ne’e lori Governu nia naran agradese ba ajuda ne’e.

“Ita iha situasaun komplikadu oituan tanba haree ba transmisaun lokál lubuk ida, tanba ne’e tempu ne’e oportunu tebes. Ita tenke agradese ba Governu Nova Zelándia ne’ebé prontu atu ajuda ita iha tempu saida de’it, liu-liu iha tempu susar nia laran,” Governante ne’e dehan iha Aeroportu Comoro, tersa ne’e.

Ekipamentu protesaun COVID-19 ne’ebé tula hosi Aviaun Herkules Nova Zelándia to’o iha Aeroportu Comoro, tersa (23/03). Imajen TATOLI/António Gonçalves

Tuir nia, Governu Nova Zelándia nia tulun ba Timor-Leste la’ós de’it agora, maibé desde tempu funu to’o independénsia.

Iha fatin hanesan, Embaixadór Nova Zelándia iha Timor-Leste, Philip Hewitt, hateten Governu Nova Zelándia sei kontinua apoia Timor-Leste iha situasaun COVID-19 no dezenvolvimentu nasionál.

“País rua iha amizade kleur ona no ami sente orgullu halo parseriu ho Governu Timor-Leste hodi apoiu responde ba COVID-19, ne’ebé hanesan intervensaun Governu Nova Zelándia iha fevereiru 2020 bainhira evakuasaun estudante timor-oan 17 hosi Wuhan, Xina mai Dili,” nia dehan.

Voo ho tipu charter ne’e, bazeia ba pedidu hosi Embaixada Nova Zelándia ne’ebé diriji ba parte Autoridade Aviasaun Sivíl Timor-Leste (AACTL, sigla portugés), ne’ebé antes ne’e Governu nasaun rua kompremetidu hakarak tulun malu iha situasaun COVID-19 liuhosi apoiu úmanitariu.

Ekipamentu protesaun COVID-19 ne’ebé tula hosi Aviaun Herkules Nova Zelándia to’o iha Aeroportu Comoro, tersa (23/03). Imajen TATOLI/António Gonçalves

Sasán hirak ne’e hanesan face shield 13.500, luvas medida M, L no XL 80.00, hand sanitizer mili litru 500 iha botir hamutuk 600 (ethanol 80%), roupa izolamentu medida XXL hamutuk 5.750, XL 5.750, L 5.750, máskara médika 52.000, óklu protesaun 600, antibaktéria komprimidu iha embalajen (30/embalajen) iha 60, termométru infrared 150, saku lixu biolójiku 5.000, ekipamentu teste swab 550, kapa ba sapatu 9.000, sharps container litru 7,6 hamutuk 250, respiradór partikuladu (N95 ou ekivalente) 9.000.

Tuir ajenda, iha tuku 11:02 aviaun ne’e sei aranka filafali bá Nova Zelándia.

Jornalista: Natalino Costa
Editora: Julia Chatarina

HAKEREK NO HATÁN

Please enter your comment!
Please enter your name here