iklan

INTERNASIONÁL, HEADLINE

Governu halo pagamentu renda-kustu operasionál ba reprezentante iha rai-li’ur 25

Governu halo pagamentu renda-kustu operasionál ba reprezentante iha rai-li’ur 25

Embaixada Timor-Leste iha Tóquiu, Japaun. Imajen/Wikimedia

DILI, 23 marsu 2021 (TATOLI)–Ministériu Finansa (MF) no Ministériu Negósiu Estranjeiru no Kooperasaun (MNEK) iha loron 19 marsu ne’e, halo ona transferénsia pagamentu ba renda no kustu operasionál ba Embaixada no Konsuladu sira iha rai-li’ur hamutuk 20, ba períodu tinan 2021 ho totál transferénsia $1.988.500.

Totál transferénsia, inklui ho kustu operasionál períodu janeiru to’o juñu 2021 ba Embaixada no Konsuladu sira iha rai-li’ur hamutuk lima.

Tuir nota ne’ebé Agência TATOLI asesu, tersa ne’e, haktuir katak transferénsia pagamentu renda iha tinan 2021 ba reprezentante hamutuk 20 hanesan Konsuladu Sydney, Konsuladu Darwin, Konsuladu Atambua (Indonézia), Brunei Darussalam, Kamboja, Kuba (Havana), Mozambique (Maputu), Filipina (Manila), Koreia Súl (Seoul), Xina (Beijing), Vatikanu, Estadu Unido Amérika (Washington DC), Laos, Reinu Unidu (Londres), CPLP, Bruxelas, Malázia, Birmánia, Nova Zelándia no Tóquiu, Japaun.

Notísia relevante: MNEK submete pedidu pagamentu 27 renda-kustu operasionál reprezentante iha rai-li’ur

Aleinde ne’e, MNEK mós hetan ona konfirmasaun eskrita no telefone katak Konsuladu Jerál Timor-Leste iha Sydney, simu ona transferénsia pagamentu renda tinan 2021.

“Hafoin MNEK halo identifikasaun, nota katak iha alterasaun ba dirasaun benefisiáriu no númeru IBAN ne’ebé presiza ajusta iha sistema atubele fasilita transferénsia. Alterasaun ne’e ministériu simu hosi Konsuladu Sydney iha fulan-janeiru klaran no 25 fevereiru,” nota ne’e esklarese.

Enkuantu, transferénsia pagamentu ba kustu operasionál hamutuk lima hanesan, Nova Iorke, Bruxelas, Bangkok (Tailándia), Vietname no Jenebra.

Nune’e, transferénsia pagamentu renda Embaixada Timor-Leste iha Brazíl ba tinan 2021 no kustu operasionál Embaixada Timor-Leste iha Vatikanu ba períodu janeiru to’o juñu 2021, MNEK submete ona ba MF no sei prosesa iha semana ida-ne’e nia laran.

Kustu operasionál tinan 2020 ba Konsuladu Timor-Leste iha Sydney ne’ebé mak sei pendente hela, MNEK no MF sei realiza transferénsia pagamentu iha tempu badak nia laran.

Jornalista: Antónia Gusmão

Editora: Julia Chatarina 

iklan
iklan

Leave a Reply

iklan
error: Content is protected !!