Loron mundiál meteorolójiku. Imajen/WMO

DILI, 23 marsu 2021 (TATOLI)–Diresaun Nasionál Metrolojia no Jeofízika (DNMG, sigla portugés) hamutuk ho ekipa previzaun tempu no klima, kontinua hatudu kompromisu no kaer metin vizaun atu atualiza dadus ne’ebé konfiável ba populasaun.

Diretór Nasionál Metrolojia no Jeofízika, hosi Ministériu Transporte no Telekomunikasaun (MTK), Terencio Fernades Moniz, hateten desde diresaun ne’e estabelese iha tinan 2003 to’o agora, kontinua misaun analiza no hatene kona-ba fenómenu metrolojia, klimatolojia no jeofízika hodi prepara dadus ne’ebé efesiente, efektivu no seguru tuir evolusaun globál.

“Ami-nia vizaun atualiza dadus konfiável, responsivu no aptu hodi suporta protesaun no seguransa ba populasaun no susesu ba dezenvovelmentu nasionál inklui partisipa ativamente iha atividade internasionál,” Diretór Terencio relata ba Agência TATOLI, iha ninia knaar fatin, Caicoli, Dili, tersa ne’e.

Salaun ba sentru monitoramentu ba ekipa previzaun tempu no klimátika.Imajen/GNMG

Dirijente ne’e reitera kompromisu, relasiona ho komemorasaun mundiál meteorolójiku ba dala-71 ne’ebé monu iha loron 23 marsu, ho tema mundiál ba tinan ne’e  mak “the ocean, our climate and weather”.

Tuir Diretór ne’e, kondisaun metrolojia no klimatolójiku iha tinan 10 ikus ne’e iha mudansa barak, liuliu iha klima no temperatura sira.

“Ezemplu, ita-nia klima iha temperatura ár no temperatura superficie tasi-nia ne’ebé vária signifikativamente iha mudansa (aumenta no diminui) kompara ho media klimatolojia,” nia akresenta.

Nune’e mós, kondisaun udan ikus ne’e, iha tinan balun Timor-Leste hetan udan been barak, hanesan iha tinan 2020 ne’ebé afeta ba inundasaun iha área Dili, Suai no Viqueque no iha tinan balun ne’ebé hetan udan been menus kompara ho media klimatolojia hanesan iha tinan 2019 ne’ebé afeta bai-loron naruk, no seluk tan.

“Serbisu DNMG iha tinan 10 ikus difísil tebes iha rekursu no fasilidade hodi asesu ba modelu meteorolójku sira, tantu modelu númeriku no modelu seluk, nune’e depende ba informasaun rai-li’ur hodi kauza divulgasaun informasaun ba komunidade sira ladún ótima,” nia hatutan.

Dadaun ne’e, GNMG liuhosi apoiu ajénsia internasionál sira, harii sentru monitoramentu hodi fasilita di’ak liután servisu meterolojia no ajuda tékniku sira halo previzaun tempu no sazonál inklui análiza fenómenu ka sistema meteorolójiku ne’ebé atua iha illa Timór.

Maski nune’e, nia dehan, kondisaun hirak ne’e seidauk bele garantia servisu DNMG atu partilla informasaun ne’ebé lalais no akuradu.

Tanba diresaun ne’e seidauk iha fasilidade hanesan radar meteorolójiku ne’ebé sai hanesan fatór importante ba servisu meteorólogia atubele fó informasaun  kredível no adekuadu ba públiku, prinsipalmente ba setór agrikultura, turizmu, aeronautika no marítima.

Kondisaun metrolojia no klimatolijia iha Timor-Leste

Tuir Diretór ne’e, mudansa kondisaun metrolojia no klimatolojia sempre akontese tanba fatór klimatolójiku (kobre mós fatór astronómiku), ne’ebé influénsia hosi elementu klimátiku sira, ne’ebé modifika klima lokál hanesan relevu, tipu sólu, altitude, latitude, maritimidade ka kontenentilidade no seluk tan inklui fatór metrolojiku  massa de ar, kamada atmosfera no seluk tan.

Salaun ba sentru monitoramentu ba ekipa previzaun tempu no klimátika.Imajen/GNMG

Impaktu ba Timor-Leste, bainhira tempu udan sei fó vantajen ba komunidade hodi hala’o atividade agríkola no seluk tan, maibé iha mós risku ne’ebé akontese dezastre naturál hanesan rai monu, inundasaun, alagamentu no seluk tan, aleinde ne’e fó impaktu ba bai-loron naruk.

Ho nune’e, DNMG nafatin esforsu hodi halo previzaun tempu no klima ho efisiénsia ba públiku.

“DNMG tau ona iha planu, sei estabelese estasaun meteorolojiku iha munisípiu hotu inklui Rejiaun Administrativa Espesiál Oé-cusse Ambeno (RAEOA) hodi bele halo monitoramentu,” Diretór Terencio Fernades tenik.

Nune’e mós, sempre fó solusaun atu redús risku mudansa klimátika hanesan fó sai informasaun previzaun sazonál ba parseiru hanesan Ministério Agrikultura no Peska (MAP), Sekretaria Estadu Protesaun Sivíl (SEPS), Sekretaria Estadu Ambiente (SEA), CARE Internasional, Cruz Vermelha Timor-Leste (CVTL), no seluk tan hodi prepara di’ak liután planu kontijénsia ba redusaun risku dezastre iha komunidade sira.

“Atu halo previzaun ho di’ak tenke iha dadus observadu iha kada munisípiu sira hodi halo validasaun ba previzaun tempu no halo estudu iha kualker área relasiona ho parametru meteorolójiku (anin, udan, temperature, umidade, presaun, no seluk tan).

“Diresaun ne’e mós iha dadus meteorolójiku disponível iha Sistema CLIDE, ne’ebé dadus hirak sei oferese ba públiku no sei hetan autorizaun hosi DNMG,” nia kompromete.

Iha biban ne’e, DNMG mós husu ba komunidade Timór laran tomak atu nafatin asesu informasaun previzaun tempu iha blog https://dnmgtl.blogspot.com/ inklui pájina ofisiál facebook https://www.facebook.com/dnmg.timorleste/ atu atualiza informasaun ne’ebé konfiável hodi bele prevene-an hosi risku dezastre ne’ebé la espera.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here