APFSD 2021. Imajen/ UNESCAP

DILI, 23 marsu 2021 (TATOLI)—Nasaun Unida-Komisaun Ekonómika no Sosiál ba Ázia no Pasífiku (UNESCAP, sigla inglés), realiza Fórum Ázia-Pasífiku ba Dezenvolvimentu Sustentável (APFSD, sigla inglés) 2021 ba dala-8, hahú loron 23 to’o 26 iha Bangkok, Tailándia via online.

Fórum rejionál ne’e ho intensaun hodi halo avansa progresu Objetivu Dezenvolvimentu Sustentável (ODS), ne’ebé permite revizaun no avaliasaun kredível hosi progresu inklui fahe ideia no prátika di’ak sira entre ajente Estadu no parte interesada sira.

Iha biban ne’e, Reprezentante Timor-Leste ne’ebé partisipa iha fórum virtuál ne’e, relata re-ajustamentu no dezafíu halo intervensaun atu atinje meta ODS iha ámbitu COVID-19.

“Iha relatóriu Revizaun Nasionál Voluntária (VNR, sigla ingles) 2019, ami hala’o ona alkansamentu balun, maibé iha dezafiu balun ho situasaun COVID-19 ne’ebé difikulta liután. Hanesan nasaun seluk, Timor-Leste ohin loron serbisu ba re-ajustamentu no re-orientasaun ba ami-nia intervensaun atu fila ba dalan di’ak hodi atinje meta ODS,” Koordenadór Gabinete de Apoio à Sociedade Civil (GASC), Filipe da Costa, halo intervensaun iha fórum, ne’ebé refere liuhosi nota ne’ebé Agência TATOLI asesu, tersa ne’e.

Reprezentante ne’e konta tuir, dezde Timor-Leste rejista kazu COVID-19 dahuluk iha 23 marsu 2020, fó impaktu negativu 6% ba kreximentu ekonomia, grave sub-nutrisaun no inseguransa alimentár- króniku ne’ebé afetadu ba populasaun hamutuk 36%.

“Iha tinan ida COVID-19 eziste iha Timór, ami rejista kazu ativu kuaze loron-loron hodi lori kazu ativu atuál ba 211. Tanba ne’e, Governu deside impoin Serka sanitária no konfinamentu obrigatóriu ba munisípiu tolu ne’ebé rejista kazu ativu. Situasaun ne’e permite limita movimentu no autoriza la’o kuandu iha autorizasaun,” nia hatutan.

Nia dehan, iha tinan 2020, Governu estabelese ona Sala Situasaun Sentru Integradu Jestaun Krize (CIGC, sigla portugés), ne’ebé lidera hosi Primeiru-Ministru, Taur Matan Ruak, atu jere situasaun COVID-19 iha rai-laran.

Governu aprova millaun $219,5 no kria fundu emerjénisa atu halo intervensaun ba situasaun pandemia globál, hanesan konstrui fasilidade izolamentu no kuarentena, akizisaun ekipamentu teste no protesaun COVID-19, treinamentu profisionál saúde ne’ebé serbisu ba liña frente, subsídiu uma-kain 298.495, apoiu salariál ba funsionáriu setór privadu, subsídiu eletrisidade hamutuk kleinte 160.000, distribuisaun Cesta Bázika, fornese foos hodi responde situasaun emerjénsia, oferese empréstimu emerjénsia ba empreza, estabelese sistema aprendizajen online ba edukasaun no seluk tan.

Aleinde ne’e, Timor-Leste harii Komisaun Eventuál elabora Planu Rekuperasaun Ekonómika, ne’ebé propoin totál millaun $124, aprova ona iha tinan 2021 atu implementa planu no jestaun ba kombate COVID-19, ne’ebé hodi fundu uza ona atu finansia programa 32 ho setór sira hanesan saúde, edukasaun, bee no saneamentu, dezenvolvimentu rurál, abitasaun ba ema vulnerável, produsaun agríkola, no seluk tan.

Governu husu adisionál millaun $200 hodi administra atuál surtu no vasinasaun sira.

“Iha futuru, Governu sei aumenta alokasaun orsamentu ba setór sira hanesan saúde no edukasaun, no prepara planu asaun nasionál multisetoriál ba seguransa ai-han no nutrisaun ne’ebé aumentu investimentu iha setór prioridade xave sira,” nia akresenta.

Timor-Leste mós planu ona atu lansa Kuadru Finanseiru Nasionál Integradu no sei halo avaliasaun ba Planu Estratéjiku Dezenvolvimentu (PED).

“Ami otimista ho koordenasaun di’ak, transparénsia liután no bele halo aliñamentu programa hodi ajuda hadi’a situasaun, nune’e alkansa objetivu ODS 2030,” nia tenik. 

Antes ne’e, iha jullu 2019, Grupu Traballu hosi Timor-Leste aprezenta ona rezultadu implementasaun ODS, iha Nova Iorke.

Timor-Leste foku ba ODS númeru 2 eradika hamlaha, 3 saúde no bem estár, 4 eduksaun ho kualidade, 5 igualdade jéneru, 6 bee-moos no saneamentu inklui 9 indústria, inovasaun no infraestrutura.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here