Traballadór sira hatun foos iha Portu Dili. Imajen TATOLI/António Gonçalves

DILI, 23 marsu 2021 (TATOLI)-Administradór munisípiu Lautém, Domingos Sávio, informa Sentru Lojístika Nasionál (CLN, sigla Portugés) transporta ona foos tonelada 1.000 ba Lautém atu halo intervesaun merkadu tanba hosi munisípiu ne’e labele halo movimentu.

Daudaun Governu impoin serka sanitária no konfinamentu domisiliáriu jerál obrigatóriu iha Baucau no Viqueque hahú loron 16 to’o 29 marsu no iha Dili hahú 16 marsu to’o 02 abríl.

“Ohin karreta kuaze ualu mak tula ona foos mai, balun iha dokumentu ami autoriza tama mai, maibé sira ne’ebé laiha dokumentu liuliu sertifikadu livre hosi COVID-19 ne’e ami haruka fila. Maski populasaun balun hamlaha maibé sei buka dalan hodi sustenta moris maibé kuandu COVID-19 mak tama ona ita susar atu prevene no buka ai-moruk,” Administradór Lautém ne’e hateten ba Agência TATOLI, via telefónika, tersa ne’e.

Notísia relevante: CLN prepara foos tonelada 12.000 hodi responde ba situasaun emerjénsia

Tuir Administradór, autoridade lakohi iha esperénsia ne’ebé akontese iha loron hirak liubá bainhira Sala Situasaun, Sentru Integradu Jestaun Krize (CIGC, sigla portugés) autoriza joven ida hosi Dili bá suku Home, Lautém, tuir seremónia iha mate-uma no bainhira halo teste swab deteta pozitivu COVID-19.

“Ami-nia ekipa saúde no Polísia check dokumentu, lori de’it dokumentu hosi CIGC maibé laiha sertifikadu ida katak sira livre hosi COVID-19, ne’ebé ami haruka balun  fila ona bá Dili,” nia akresenta.

Transportasaun foos hosi CLN hetan ona autorizasaun hosi Sala Situasaun CIGC.

“Ami hein hotu foos ne’e mai hotu mak foin bele halo jestaun hodi halo intervesaun merkadu,” nia hatutan.

Nune’e, Administradór ne’e mós kontaktu ona Governu liuhosi Ministériu Koodenadór Asuntu EKonómiku (MKAE) atubele buka solusaun, hafoin kontinuasaun halo distribuisaun foos ba intervesaun merkadu ne’e.

Kona-ba empreza lokál ne’ebé rejistu ona atu ba sosa nesesidade bázika, nia dehan pedidu submete ona ba Sala Situasaun no daudaun hein aprovasaun hafoin autoridade sira halo guia de marça hodi bele ba sosa nesesidade bazika iha Dili.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here