Ekipa SS-CIGC hamutuk ho Ekipa Embaixada Indonézia iha Timor-Leste (TL), diskute mekanizmu prevensaun COVID-19 iha fronteira rai-rua iha salaun MNEK, segunda (22/03/21). Imajen/média IDN.

DILI, 23 marsu 2021 (TATOLI)—Ekipa Sala Situação Centro Integrado Gestão de Crise (SS-CIGC), hamutuk ho Embaixadór Indonézia iha Timor-Leste (TL), Sahat Sitorus ho ekipa, diskute mekanizmu prevensaun COVID-19 iha fronteira rai-rua, liu hosi kombate movimentu ilegál.

Hafoin enkontru, Kordenador Estadu Maiór SS-CIGC, Komodoro komandante Donaciano Costa Gomes  ‘Pedro Klamar Fuik’, hateten SS-CIGC  ho ekipa embaixada Indonézia-nian aborda hanoin importante-sira hanesan movimentu ilegál iha liña fronteira Munisípiu Bobonaro, Covalima ho Rejiaun Administrativa Espesiál Oe-cusse Ambeno (RAEOA).

Notísia relevante:COVID-19: kazu foun sia, rekoperadu haat no ativu 211

Alende ne’e, ko’alia mós asuntu ida kona-bá issue abastesimentu lojístika ne’ebé sei hala’o transportasaun sasan merkadoria, no troka kondutór iha fronteira Batugade Munisípiu Bobonaro no Mota Masin, Munisípiu Covalima.

“Asuntu rua ne’e maka parte rua diskute, atu bele haree hodi kombate COVID-19 iha fronteira rai rua. Ita iha ona konkluzaun katak, preokupasaun no interese komún maka, medida hotu-hotu ne’ebé ita foti atu kombate propagasaun COVID-19. Saida mak pasa iha sira-nia rain, bele mós benefisia ita,” Pedro Klamar Fuik hateten ba jornalista-sira, hafoin enkontru, segunda ne’e.

Pedro Klamar Fuik sente kontente tanba hosi sorumutu ne’e, Embaixadór Indonézia-nian, hatudu abertura ida di’ak tebes, katak, tenke kuda pensamentu ida kona-bá fronteira rai rua, nu’udár fronteira amizade, ho kualkér situasaun inklui kazu COVID-19 bele akontese, maibé relasaun kontinua metin liu tan.

Nune’e mós Embaixadór Indonézia iha TL, Sahat Sitorus, konsidera enkontru ne’e importante tanba nasaun rua hafahe de’it iha liña fronteira terrestre, tanba ne’e importante duni atu iha konkordánsia ba kontrolu hamutuk, relasiona ho kazu COVID-19 ne’ebe oras ne’e la’o iha nasaun rua.

Kona-bá transportasaun sasan merkadoria no prosesu troka kondutór-sira iha liña fronteira Batugade Munisípiu Bobonaro no Mota Masin Munisípiu Covalima, Embaixadór ne’e husu Governu TL atu trasa oráriu fiksu, nune’e parte rua bele kontribui kontrola hamutuk atu dezenvolve diak liu tan ekonomia iha rai rua.

Enkontru ne’ebé hala’o iha salaun Ministériu Negósiu Estranjeiru no Kooperasaun (MNEK), Praia dos Coqueiros Dili, akompaña hosi Adjunta Koordenadora Forsa Tarefa ba Mitigasaun, Odete da Silva Viegas.

Tuir dadus hosi SS-CIGC hatudu katak, to’o loron 22 marsu 2021, rejista ona kazu pozitivu COVID-19 hamutuk 211.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here