Membru Bankada PD, Mariano Assanami Sabino. Imajen Tatoli/ Egas Cristóvão.

DILI, 23 marsu 2021 (TATOLI)—Deputadu Partidu Demokrátiku (PD), Mariano Assanami Sabino, husu Governu atu fó subsídiu ba povu iha vijénsia serka sanitária no konfinamentu domisialiária hanesan opsaun ida lori povu moris hakmatek iha ida-idak nia uma.

Notísia Relevante: Assanami husu Governu halo uluk reziliénsia ba ekonomia

“PD nia sujestaun no husu ba Governu di’ak liu fó subsídiu $200 ka $300 kada fulan ba povu, hodi uza ba nesesidade loro-loron. Tanba, dalaruma ita apoia foos liuhosi programa cesta bázika, dalaruma lato’o ba sira. Ho situasaun COVID-19 ne’e, ema labele ba simu cesta bázika entaun opsaun di’ak liu mak ne’e fó de’it osan ba povu no ba estudante sira, depois sira mak ba sosa nesesidade saida mak sira presiza,” Assanami informa ba jornalista sira iha Parlamentu Nasionál, kuarta ne’e.

Prezidente Partidu Demokrátiku ne’e observa, aplikasaun medida serka sanitária no konfinamentu domisiliária ne’e halo atividade ekonomia paradu tanba maske komunidade balun faan modo atu hetan osan, maibé tanba movimentasaun publika taka halo osan laiha no nesesidade kada família nian susar tebes.

“Parlamentu aprova ona osan ba COVID-19 ne’e, ha’u husu tenke uza ho didi’ak. Se la to’o ita bele aprova tán. Maibé, labele husik povu no estudante sira iha situasaun dilemátiku, katak ba oin mós kona-ba kotuk mós kona,” nia dehan.

Tanba ne’e, PD la apoia estudante iha Dili laran atu fila-fali munisípiu tanba estudante ne’e funsaun atu estuda. Bainhira sira fila ba uma hamutuk ho sira-nia inan-aman ne’e situasaun sei defísil liu tanba balun laiha osan atu sosa foos.

Ho preokupasaun ne’e, Prezidente Partidu Demokrátiku ne’e husu ba Governu atu buka medida seluk troka medida lock down ne’e, nune’e atividade la’o hanesan bainbain maibé tenke kontinua kumpre protokolu hosi ministériu saúde no Organizasaun Saúde Mundiál (OMS) kona-ba medida prevensaun COVID-19 nian.

“Agora, Governu tenke halo jestaun oinsá mak ita labele tama beibeik ho lock down ne’e. Tanba, rai hotu-hotu iha mundu rai-kalaran ne’e, la uza ona lock down,” nia dehan.

Iha parte seluk, nia husu Governu atu hili didi’ak modelu vasinasaun, nune’e komunidade labele ta’uk atu partisipa iha programa vasinasaun COVID-19 ne’e.

“Kuandu ita halo vasinasaun ne’e, kuda virus ne’e iha ita-nia isin. Atu antesipa moras ne’e labele da’et barak, ita tenke tama ona ba vasinasaun, Maibé, buka ida-ne’ebé mak di’ak liu, nune’e povu labele ta’uk,” nia fó hanoin.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here