DILI, 23 marsu 2021 (TATOLI)-Aviaun australiana, Airnorth ho tipu VN-ANZ hosi Darwin, Austrália Norte to’o ona iha Aeroporto Internasionál Prezidente Nicolau Lobato, Comoro, Dili iha tuku 09:20.
Tuir observasaun Agência TATOLI iha terrenu, nota katak aviaun aluger ne’e tula ekipamentu diagnóstiku médiku, laboratóriu no farmásia ba Servisu Autónomu Medikamentu no Ekipamentu Saúde (SAMES) inklui sasán ba instituisaun Estadu.
Sasán hirak ne’e ho kuantidade, laboratóriu no farmásia kilograma 80,2 no ekipamentu diagnóstiku médiku kilograma 406.
Aleinde ne’e, nota mós katak sasán ne’ebé hatun hosi aviaun tuir protokolu saúde ne’ebé estabelese no simu hosi traballadór iha aeroportu, ne’ebé akompaña hosi ekipa hosi SAMES no Ministériu Saúde.
Tuir planu, Airnorth sei aranka filafali bá Darwin no aviaun seluk hosi Nova Zelándia sei to’o iha Aeroportu Comoro iha tuku 1:45.
Jornalista: Domingos Piedade Freitas
Editora: Julia Chatarina
