Enkontru entre Vise-Ministru Interiór (VMI), António Armindo no Sekretáriu Estadu ba Komunikasaun Sosiál (SEKOMS), Merício Juvinal dos Reis ‘Akara’, iha Gabinete VMI, Vila-verde, segunda (22/03). Imajen/Gabinete VMI

DILI, 22 marsu 2021 (TATOLI)–Vise-Ministru Interiór (VMI), António Armindo no Sekretáriu Estadu ba Komunikasaun Sosiál (SEKOMS), Merício Juvinal dos Reis ‘Akara’, halo enkontru hodi ko’alia kolaborasaun hodi kombate hoax ka lia falsu iha ámbitu COVID-19, ne’ebé daudaun la’o maka’as tebes sosiedade nia le’et.

“Ami na’in-rua Vise-Ministru Interiór ko’alia oinsá tau idea hamutuk identifika hoax no diskute oituan estratejia kombate hoax iha situasaun COVID-19 nia laran,” Sekretáriu Estadu Akara hateten liuhosi nota ne’ebé Agência TATOLI asesu, iha segunda ne’e.

Iha enkontru ne’ebé realiza iha Gabinete VMI, Vila-verde, parte SEKOMS hakarak kria estratéjia di’ak tanba nota katak ema hahú lansa informasaun barak liuhosi meiu komunikasaun sosiál no koko atu halo komunidade la fiar informasaun ne’ebé Governu fó sai ona.

“Komunidade sira pániku ho lia falsu sira ne’e, hafoin sira ko’alia hasoru Governu bazeia ba lia falsu, nune’e mosu dezintendementu entre ita hodi la fiar malu no hakilar malu. Tanba ne’e, maka la’ós ko’alia de’it ho Vise-Ministru Interiór, maibé sei ko’alia mós ho ministériu relevante seluk atu esforsu hamutuk kombate hoax tanba serbisu ne’e ita hotu nia,” nia akresenta.

SEKOMS mós sei ko’alia ho órgaun komunikasaun sosiál sira atu ajuda públiku uza espasu plataforma online atu fó vantajen pozitivu no responsabilidade.

Biban hanesan, Vise-Ministru Interiór, António Armindo, hateten nia parte sei koordena ho parte Polísia Nasionál Timor-Leste (PNTL) hodi haree asuntu ne’e.

“Ita hotu hatene katak hoax sai ameasa boot ida, liu-liu iha ambiente COVID-19 nia laran tanba ema aproveita espalla informasaun falsu,” nia tenik.

Governante ne’e konsidera importante atu koordenasaun serbisu ho parte relevante, ne’ebé parte Ministériu Interiór (MI) prontu kolabora hamutuk ho PNTL hodi identifika no evita lia bosok ne’ebé espalla iha komunidade nia le’et.

Vise-Ministru apela komunidade sira hahú hosi nível estudandante, juventude no sosiedade ein jerál, atu fiar de’it informasaun relasiona ho COVID-19 hosi fonte kredível ka hosi instituisaun ne’ebé iha autoridade atu hato’o informasaun hanesan hosi Ministériu Saúde no Sala Situasaun, Sentru Integradu Jesatun Krize (CIGC, sigla portugés).

“Husu ema hotu rejeita fahe tutan informasaun falsu hodi evita sosiedade konsumu informasaun ne’ebé laloos,” nia akresenta.

Vise-Ministru apresia serbisu SEKOMS, ne’ebé ho esforsu maka’as hakarak serbisu ho entidade tomak kombate hoax.

 Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here