Mapa K-RDTL. Imajen/Espesiál

DILI, 22 marsu 2021 (TATOLI)–Relasiona ho komemorasaun loron Konstituisaun Repúblika Demokrátika Timor-Leste (K-RDTL) ba dala-19, TANE Konsumidór apresia membru Asembleia Konstituinte tanba bele inklui artigu kona-ba Direitu Konsumidór.

“Iha biban ne, TANE agradese membru Assembleia Konstituinte sira ne’ebé aprova Konstituisaun RDTL no salva guarda iha artigu 53º kona-ba Direitu ba konsumidór sira,” refere nota ne’ebé Agência TATOLI asesu, segunda ne’e.

Iha artigu 53º, haktuir katak konsumidór iha direitu ba kualidade sasán no servisu ne’ebé konsumu, ba informasaun loloos no ba protesaun saúde, seguransa no interese ekonómiku hanesan hadi’a sasán ne’ebé a’at.

Nune’e mós, publisidade hanesan disiplina ne’ebé hatuur ona iha lei no bandu halo publisidade subar-an, indireta no enganosa.

Iha biban ne’e, TANE husu ba Governu halo medida hodi fó garantia ba povu nia moris iha períodu serka sanitária no konfinamentu domisiliáriu jerál iha munisípiu Dili, Baucau no Viqueque.

Asosiasaun ne’e konsidera Timor-Leste no mundu tomak hasoru krize pandemia no ninia impaktu la’ós de’it ba saúde públika, maibé mós krize sosiu-ekonómiku.

TANE Konsumidór husu Governu hola medida hodi garante servisu públiku esensiál hanesan asesu ba ai-han, asesu ba bee-moos, eletresidade no servisu telekomunikasaun,” subliña nota ne’e.

Aleinde ne’e, asosiasaun ne’e prontu nafatin atende konsumidór sira liuhosi online liuhosi portál http://tanekonsumidor.tl ka pajina facebook https://www.facebook.com/TaneKonsumidor/.

Iha loron 22 marsu 2001, membru Asembleia Konstituinte hamutuk na’in-88, ne’ebé eleitu iha loron 30 agostu 2001, aprova K-RDTL kompostu hosi artigu 167, ne’ebé sai lei fundamentál ba Estadu Direitu Demokrátiku.

Deputadu 88 mai hosi bankada parlamentár 13, kompostu hosi mane 65 no feto 23.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here